Atyraý qalasynyń eks-ákimi tergeý ızolıatorynan úıqamaqqa jiberildi

ATYRAÝ. KAZINFORM — Atyraý qalasynyń burynǵy ákimi Qaırat Orazbaev ýaqytsha tergeý ızolıatorynan úıqamaqqa shyǵaryldy. Mundaı sheshim qabyldaýǵa burynǵy ákimniń densaýlyq jaǵdaıy sebep bolǵan. 

Oblystyq sottyń baspasóz qyzmeti rastaǵan derekke qaraǵanda, eks-ákim úıqamaqqa bir aı buryn shyǵarylǵan.

«Atyraý qalasynyń mamandandyrylǵan tergeý sotynyń 2023 jylǵy 11 qarashadaǵy qaýlysymen Qaırat Orazbaevqa qatysty eki aı merzimge kúzetpen ustaý túrindegi bultartpaý sharasy sanktsııalanǵan edi. Atyraý oblysy prokýrorynyń ótinishhaty boıynsha mamandandyrylǵan tergeý sotynyń 2023 jyldyń 22 jeltoqsandaǵy qaýlysymen Q.Orazbaevqa qatysty bultartpaý sharasy onyń densaýlyq jaǵdaıyna baılanysty úıqamaq túrindegi bultartpaý sharasyna ózgertildi», - dep habarlady sottyń baspasóz qyzmeti.

Eske sala ketelik, byltyrǵy qarashada Atyraý qalasynyń burynǵy ákimi Qaırat Orazbaev qamaýǵa alyndy. 

Oblystyq prokýratýranyń baspasóz qyzmetinen málim etkendeı, Atyraý qalalyq ákimdiginiń laýazymdy tulǵalaryna qatysty alaıaqtyq belgilerimen sotqa deıingi tergep-tekserý bastalǵan edi.

«2020-2022 jyldar kezeńinde ákimdiktiń laýazymdy tulǵalary jeke turǵyn úı qurylystary úshin rekreatsııalyq aımaqtarǵa, onyń ishinde jasyl jelek aımaqtary, saıabaqtar, skverler, jaǵalaýlar jáne taǵy basqa sanatqa jatatyn jer ýchaskelerin zańsyz bergeni anyqtaldy. Osyǵan baılanysty búgin QR Qylmystyq Kodeksiniń 190-baby 4-bóliginiń 2-tarmaǵynda kózdelgen qylmystyq quqyq buzýshylyq jasady degen kúdik boıynsha tergeý sheńberinde Atyraý qalasynyń eks-ákimi Qaırat Orazbaev ustaldy», - dep málim etken edi prokýratýranyń baspasóz qyzmetinen.

Keıin burynǵy ákim Qaırat Orazbaev eki aı qamaýda otyratynyn jazǵan edik. 

Qaırat Orazbaevtyń — mamandyǵy munaıshy. Ol biraz jyl Atyraý munaı óńdeý zaýytynda jumys istep, keıin bas dırektory bolǵan. Budan soń Atyraý qalasynyń ákimi laýazymyn atqarǵan.