Atyraý qalasynyń burynǵy ákimi Qaırat Orazbaev eki aı qamaýda otyrady
Atyraý qalasynyń burynǵy ákimi Qaırat Orazbaev eki aı qamaýda otyratyn boldy, dep habarlaıdy Kazinform.
«Atyraý qalasynyń mamandandyrylǵan tergeý sotynyń qaýlysymen Qaırat Orazbaevqa qatysty eki aı merzimge kúzetpen ustaý túrindegi bultartpaý sharasy sanktsııalandy», - dep habarlady oblystyq sottyń baspasóz qyzmeti.
Budan buryn habarlaǵanymyzdaı, Atyraý qalasynyń burynǵy ákimi Qaırat Orazbaev qamaýǵa alynǵan edi. Oblystyq prokýratýranyń baspasóz qyzmetinen málim etkendeı, Atyraý qalalyq ákimdiginiń laýazymdy tulǵalaryna qatysty alaıaqtyq belgilerimen sotqa deıingi tergep-tekserý júrgizilip jatyr.
«2020-2022 jyldar kezeńinde ákimdiktiń laýazymdy tulǵalary jeke turǵyn úı qurylystary úshin rekreatsııalyq aımaqtarǵa, onyń ishinde jasyl jelek aımaqtary, saıabaqtar, skverler, jaǵalaýlar jáne taǵy basqa sanatqa jatatyn jer ýchaskelerin zańsyz bergeni anyqtaldy. Osyǵan baılanysty QR Qylmystyq kodeksiniń 190-baby 4-bóliginiń 2-tarmaǵynda kózdelgen qylmystyq quqyq buzýshylyq jasady degen kúdik boıynsha tergeý sheńberinde Atyraý qalasynyń eks-ákimi Qaırat Orazbaev ustaldy», - dep málim etti prokýratýranyń baspasóz qyzmetinen.
Qaırat Orazbaev eńbek jolyn munaı-gaz ónerkásibinde bastaǵan. Atyraý munaı óńdeý zaýytynyń bas dırektory, keıin Atyraý qalasynyń ákimi laýazymyn atqarǵan.
