Atyraý qalasynyń bir bóligi men eldi mekender jaryqsyz qaldy

ATYRAÝ. KAZINFORM – Atyraý qalasynda birneshe shaǵyn aýdanda elektr jaryǵy óship qaldy. Munaıly shaharǵa irgeles ornalasqan eldi mekenderde de jaryq joq. 

Atyraý oblysynyń energetıkalyq kesheni baspasóz qyzmetiniń málimetinshe, jaryqtyń sónýine aýa raıynyń qolaısyzdyǵy sebep bolǵan.

«Atyraýda jańbyr jaýyp, ekpindi jel soqty. Sonyń saldarynan Atyraý qalasyndaǵy «Avangard», «Nursaıa», «Juldyz-2» shaǵyn aýdandarynda, Amangeldi, Damby, Aqjar-1 aýyldarynda elektr jaryǵy óshti. Qazir Atyraý qalalyq elektr jelisiniń arnaıy brıgadalary aqaýdy qalpyna keltirý jumysyn júrgizip jatyr», - dep habarlady energetıkalyq keshenniń baspasóz qyzmeti.

Elektr jelisindegi aqaýdy qalpyna keltirýge 8 brıgada, 11 kólik, jyljymaly zerthana tartylǵan.

Eske sala ketelik, budan buryn Atyraý qalasyndaǵy bir shaǵyn aýdan jaryqsyz qalǵanyn habarlaǵan bolatynbyz.