Atyraý qalasynyń ákimi qaıtys boldy degen jalǵan aqparat tarady

ATYRAÝ. KAZINFORM – Atyraý qalasynyń ákimi qaıtys boldy degen jalǵan aqparat tarady. Oblystyq jedel shtab bul aqparatty joqqa shyǵardy.

«Tótenshe jaǵdaı jónindegi jedel shtabtyń jalǵan akkaýntynda Atyraý qalasynyń ákimi Shákir Keıkınniń kenetten qaıtys bolǵany týraly aqparat shyqty. Bul aqparat shyndyqqa janaspaıdy. Tótenshe jaǵdaı rejımi aıasynda jalǵan aqparat taratqany úshin quqyq buzýshyǵa qylmystyq jaýapkershilik júkteletinin eske salamyz. Qazir quqyq qorǵaý organdary tıisti sharalardy qoldaný úshin tótenshe jaǵdaılar jónindegi jedel shtabtyń atyn jamylǵan jalǵan akkaýnt ıesin izdeýmen aınalysýda», -dep habarlady oblystyq jedel shtab. 

Oblystyq jedel shtabtyń aqparatyna qaraǵanda, Atyraý qalasynyń ákimi Shákir Keıkın jedel shtabtyń jıynysyna qatysqan. Ákim Atyraý qalasyndaǵy sý tasqynyna daıyndyq barysy týraly kezekti baıandama jasaǵan.

Eske sala ketelik, budan buryn Atyraýda qosymsha áýe reısteri eki ese kóbeıip, 5 kúnde 8 300 jolaýshy ushqanyn jazǵan edik.