Atyraý qalasynda ıt aýlaý jumysy toqtap qaldy
ATYRAÝ.KAZINFORM - Atyraý qalasynda qańǵybas ıtterdi aýlaý jumysy ýaqytsha toqtap tur. Úsh aılyq kelisimshart aıasynda 3 myńǵa jýyq ıt aýlansa, jyl sońyna deıingi jańa konkýrs ázirge jarııalanbaǵan.
Atyraý qalalyq ákimdiginiń málimetinshe, úsh aılyq kelisimshart aıasynda 3 myńǵa jýyq qańǵybas ıt aýlanǵan. Tehnıkalyq talapta qalalyq ákimdik bir ıtke qatysty jumysty 8 myń teńgege baǵalady. Bul qunǵa aýlaý, ýaqytsha ustaý, tasymaldaý jáne joıý kiredi. Naqty qaralǵan 36 mln teńgeni 8 myń teńgege bóletin bolsaq bul qarjy 4500-deı ıtti qamtýǵa jetedi.
– Jumystar Atyraý oblystyq máslıhaty bekitken qaǵıdalarǵa jáne qoldanystaǵy kelisimshart talaptaryna sáıkes júrgizildi. Atalǵan kezeńde jumystar turǵyndardan kelip túsken ótinishter negizinde uıymdastyryldy. Atap aıtqanda, qoǵamǵa qaýip tóndiretin, adamdar men janýarlarǵa shabýyl jasaǵan, sondaı-aq emdelmeıtin aýrý belgileri bar janýarlardy aýlaý sharalary qolǵa alyndy, – dep habarlady ákimdikten.
Resmı aqparatqa súıensek, aýlanǵan ıtter tabıǵı mekendeý ortasyna qaıta jiberilmegen. Merdiger men ákimdik arasyndaǵy kelisimde sterılızatsııa qarastyrylmaǵan. Qazir jyl sońyna deıingi kezeńdi qamtıtyn jańa kelisimshart jasaý máselesi qarastyrylyp jatyr.
– Buǵan deıin qoldanylǵan úsh aılyq tájirıbeden aıyrmashylyǵy, endigi jospar boıynsha jyl sońyna deıingi merzimdi qamtıtyn bir konkýrs ótkizý kózdelip otyr. Qajetti qarjy kólemi josparlanǵan jumystyń aýqymyna jáne aýlanýy tıis janýarlar sanyna sáıkes aıqyndalady. Qazirgi ýaqytta konkýrsqa qajetti qujattardy ázirleý jáne memlekettik satyp alý portaly arqyly elektrondyq konkýrs jarııalaý jumysy júrip jatyr, – dep málim etti ákimdiktiń baspasóz qyzmeti.
Byltyr Atyraý oblysynda 10 myńǵa jýyq buralqy ıt aýlanǵan edi.
