Atyraý qalasynda erlerge arnalǵan túrme órtendi
ATYRAÝ. KAZINFORM — Búgin Atyraý oblysy Tótenshe jaǵdaılar departamentiniń 112 pýltine Atyraýǵa qarasty Tasqala aýylynda ornalasqan túzeý mekemesiniń ǵımaratynyń shatyrynan tútin shyqqany týraly habarlama tústi.
TJD málimetinshe, oqıǵa ornyna qutqarýshylar men tehnıkalar jedel jetkende eki qabatty ǵımarattyń shatyry órtenip jatqany belgili bolǵan.
Órt shyqqan sátte ǵımarattaǵy adamdar keshki serýende bolǵan, ıaǵnı, adamdardy evakýatsııalaý qajettiligi týyndaǵan joq.
— Zardap shekkender men qaza tapqandar joq. TJD kúshteri men tehnıkasynyń jedel ári úılesimdi áreketteriniń nátıjesinde órt tolyqtaı sóndirildi, — dep málimdedi departamenttiń baspasóz qyzmeti.
Qazir órttiń neden shyqqany anyqtalyp jatyr. Oqıǵaǵa qatysty tıisti tekserý jumysy júrip jatyr.
Osyǵan deıin Atyraý qalasyndaǵy bazar aýmaǵynda órt shyqqanyn jazǵan edik.