Atyraý qalasynda 162 kóshege asfalt salý úshin 28,8 mlrd teńge qajet

ATYRAÝ. KAZINFORM — Atyraý qalasynda 162 kóshege 67,6 shaqyrym tasjol kerek. Bul kóshelerde asfalt buryn-sońdy bolmaǵan nemese tolyq qamtylmaı qalǵan.  

Ákimdik máseleni sheshý maqsatynda bir jyl buryn jobalaý jumystaryna kirisken.

Sheneýnikterdiń sózinshe, atalǵan aýmaqty tasjolmen qamtý bir jylda múmkin emes. Óıtkeni, joba quny 28,8 mlrd teńgeni quraıdy.

Kólik ınfraqurylymyn damytý jobasy «Samal», «Órken», «Atyraý», «Bereke», «Munaıshy», «Jumysker», «Órken» yqsham aýdandaryn jáne Erkinqala, Almaly, Qaıyrshaqty, Damby, Atyraý aýyldyq okrýgterin qamtıdy.

— 67,6 shaqyrymǵa jol salý jumysy úshke bólinip, 3 merdiger mekemege tapsyrylatyn bolady. Bıyl biz halyq kópten surap júrgen «Samal» yqsham aýdany boıynsha 4,1 shaqyrymdy quraıtyn 9 kóshege, Aqsaı eldi mekenindegi 5 ótkelge jol salý jumysyn bastaımyz. Osy jyly az degende 20 shaqyrym jolǵa asfalt salý jumysyna kirisemiz. Jalpy bul joba — aýyspaly, ıaǵnı, qurylys jumysyn tolyqtaı aıaqtaýǵa 2 jyl ýaqyt kerek, — dedi Atyraý qalalyq jolaýshylar kóligi jáne avtomobıl joldary bólimi basshysynyń orynbasary Almas Sársenov.

Aıta keteıik, bıyl qoldanystaǵy avtokólik joldaryndaǵy shuńqyrlardy jamap-jasqaý maqsatynda 30 myń sharshy metr aýmaqqa jóndeý jumysy isteledi.

Osyǵan deıin Atyraýdaǵy kópirlerdiń jaǵdaıyna júrgizýshilerdiń kóńili tolmaıtynyn jazǵan edik.