Atyraý qalasynda 144 myńnan asa adam jer kezeginde tur
ATYRAÝ. KAZINFORM — Atyraý qalasynda jer kezeginde turǵan adamdarǵa ýchaske berý jumysy toqtap tur. Óıtkeni, ınjenerlik jelilermen tolyq qamtylǵan daıyn ýchaskeler joq. Jalpy 1999 jyldan bastap jer ýchaskesin berý týraly 144 myńnan asa aryz túsken. Onyń 6 myńy 1999-2006 jyl aralyǵynda jazylǵan.
— 2024 jyldyń sońy men 2025 jyldyń basynda Qaınar turǵyn úı alabynan ýchaskeler berildi. Qazirgi ýaqytta Erkinqala aýylynan, Juldyz-4, Aqsaı yqshamaýdandarynan 5 myńǵa jýyq jerimiz daıyn bolǵanmen, ınjenerlik jeliler júrgizilmegen. Eń úlken turǵyn úı alaby Erkinqala aýylynda ornalasqan. Ol jaqta 3 myńǵa jýyq ýchaske bar. Sý kóterý stantsııasyna baılanysty másele týyndap, sol aýylda sý kóterý stantsııasynyń qurylysyn bastaý josparda bar. Jobasy aıaqtaldy. Qarjy bólinse bıyl iske kirisemiz, — dep pikir bildirdi Tilek Mahýov.
Erkinqala aýylyndaǵy qosalqy stantsııalardyń kerneýleriniń az bolýyna baılanysty jańa ýchaskelerdi tok kózimen qamtý múmkin bolmaı otyr. Qosalqy stantsııalardyń qýattylyǵyn kóbeıtý jumysy uıymdastyralady deıdi sheneýnikter. Sondaı-aq ákimdik ol ýchaskelerge káriz júıesin júrgizbek oıda.
— Bıyl jer ýchaskeleri beriledi dep aıtý qıyn. Búginde qosymsha Samal yqsham aýdanynan 140-qa jýyq ýchaske daıyndap jatyrmyz. Sý men gaz júıesi júrgizildi. Elektr jelisin júrgizý jumysyn aıaqtap, osy jyly kezekte turǵandarǵa berýge tyrysamyz, - dedi qala ákiminiń orynbasary.
Búginde qala bıligi jer berý jumysynyń qashan tolyq jandanatynyn dóp basyp aıta almaıdy. Sebebi, ınfraqurylym tartý jumysynyń qashan bastalary beımálim. Buǵan deıin Jambylda ákimdiktiń kesirinen fermerler jer telimderin ala almaǵanyn jazǵan edik.
