Atyraý qalasyna jańa ákim taǵaıyndaldy
ATYRAÝ. KAZINFORM — Atyraý qalasynyń ákimi bolyp «Atyraý» áleýmettik kásipkerlik korporatsııasynyń basshysy Danııar Tahanov taǵaıyndaldy.
Danııar Tahanov 1985 jyly Atyraý qalasynda dúnıege kelgen.
2003-2007 jyldary Qytaı munaı ýnıversıtetinde iskerlik ákimshilendirý mamandyǵy boıynsha bakalavr dárejesin aldy. 2007-2009 jyldary atalǵan ýnıversıtette ekonomıka salasynda magıstratýrada bilim alyp, Qazaqstan Respýblıkasy Prezıdentiniń «Bolashaq» halyqaralyq stıpendııasynyń ıegeri atandy.
Eńbek jolyn 2008 jyly Qazaqstan Respýblıkasynyń Saýda-ónerkásip palatasynyń Qytaıdaǵy ókildiginde munaı jabdyqtary bóliminiń menedjeri qyzmetinen bastady.
2009-2010 jyldary «NGSK KazStroıServıs» AQ-da jobany basqarý jónindegi kómekshi — halyqaralyq jáne arnaıy jobalar boıynsha bas dırektordyń orynbasary qyzmetin atqardy. 2010-2011 jyldary osy kompanııanyń Atyraýdaǵy halyqaralyq jáne arnaıy jobalar departamentinde satyp alý jónindegi menedjer boldy.
2011-2012 jyldary «KTK SERVIS» JShS bas dırektorynyń bıznes damytý jónindegi orynbasary qyzmetin atqardy.
2012 jyly «Sınopek Injınırıng» kompanııasynyń Atyraýdaǵy fılıalynda óndiristi basqarýdy uıymdastyrý jónindegi ınjener bolyp jumys istedi.
2012-2016 jyldary «Oral ÁKK» AQ basqarma tóraǵasynyń orynbasary qyzmetin atqardy.
2016-2017 jyldary «Atyraý Innovations» JShS dırektory boldy. 2017 jyldyń qazan aıynan bastap «Atyraý» ÁKK» AQ basqarma tóraǵasynyń birinshi orynbasary qyzmetinde eńbek etti.
2022 jyldan beri «Atyraý» ÁKK» AQ basqarma tóraǵasy bolyp jumys istedi.
Buǵan deıin Atyraý qalasynyń ákimi Shákir Keıkın qyzmetinen óz erkimen ketken edi.
