Atyraý qalasy men 4 aýdanda jer berý toqtap tur
ATYRAÝ. KAZINFORM — Búginde Atyraý oblysynda 180 myńnan asa adam jer kezeginde tur. Bıyl 900 jer ýchaskesin berý josparlanyp otyr.
2025 jyly men 2026 jyldyń basynan beri 927 jer ýchaskesi memleketten jeke úı salý maqsatynda jer berilgen. Al jalpy 2022 jyl elektrondy kezek bastalǵaly 4909 jer ýchaskesi paıdalanýǵa tapsyrylǵan.
— Qazirgi ýaqytta óńirde Jylyoı, Maqat, Qurmanǵazy jáne Qyzylqoǵa aýdandarynda Jer Kodeksiniń talaptaryna sáıkes daıyn alaptardyń bolmaýyna baılanysty jer berý toqtap tur. Bıyl óńir boıynsha shamamen 900 jer ýchaskesin tabystaý josparlanyp otyr, — dep málimdedi oblys ákimdiginiń baspasóz qyzmeti.
Óńir halqynyń basym bóligi oblys ortalyǵynan jer alǵysy keledi. Qala boıynsha 144 adam ýchaskesin jyldap kútýge májbúr.
Azamattardyń basym bóligi aýdan ortalyqtarynan jer ıemdengisi keledi. Degenmen basty másele ınjenerlik jelilermen qamtylǵan daıyn ýchaskelerdiń bolmaýymen baılanysty. Mysaly, Qulsary qalasynda 13 myńǵa jýyq adam jer kezeginde tur. Olardyń basym kópshiligi shahar aýmaǵynan jer surap otyr. Al ákimdik búginde aýyldyq okrýgterden jer berýge daıynbyz deıdi. Mysaly, aýdanǵa qarasty Aqkıiztoǵaı aýylynda 300-ge jýyq jer ýchaskesi daıyn. Jańaqaraton kentinde de bos turǵan ýchaskeler kóp.
— Jer surap kelgen azamattardyń barlyǵy aýyldarǵa kezekke turyp, alsa bolady. Qulsary qalasynda 1993 jyldan bastan berilgen ýchaskelerge jol salý, kóshe jaryǵyn júrgizý syndy jumysty tolyq aıaqtaǵannan keıin jańa ýchaskelerdi daıyndaýǵa kirisemiz. Turǵyndardyń ótinishin qanaǵattandyrý úshin Bolashaq-2 yqsham aýdanyn qarastyryp jatyrmyz. 2400 ýchaske daıyndalyp jatyr, — dedi Jylyoı aýdanynyń ákimi Jumabek Qarajanov.
Buǵan deıin Pavlodarda jer kezeginde 66 myńǵa jýyq adam turǵanyn jazǵan edik.
