Atyraý-Inder trassasy sý ótkizetin qubyr salý úshin ýaqytsha jabylady

ATYRAÝ. KAZINFORM – Atyraý-Inder baǵytyndaǵy oblystyq mańyzy bar trassa sý ótkizetin qubyr salý úshin ýaqytsha jabylady. Bul joldy búgin tún ortasynda jabý kózdelip otyr.

Atyraý qalasy ákiminiń orynbasary Nurjan Ermuhanovtyń málimetinshe, búgin, 20 mamyrda atalǵan joldyń 25-shaqyrymynyń ústimen tasqyn sý ótken. 

«Jaıyq ózeninen jazyqqa jaıylǵan sýdyń jol ústine shyǵyp ketti. Osyǵan baılanysty joldyń Jaıyq jaq betine jedel bóget soǵý jumysy júrip jatyr. Qazir oqıǵa ornynda 15 aýyr tehnıka jol jıegine bóget soǵý úshin topyraq tógýge tartyldy. Bóget salýǵa 15 adam jumyldy. Ázirge jol jabylǵan joq. Biraq, 20 mamyrdan 21 mamyrǵa qaraǵan túngi saǵat 00:00-de jol ýaqytsha jabylady. Sol kezde bul jolǵa sý ótkizgish qubyrlar salý jumysy júrgiziledi», -dedi Nurjan Ermuhanov. 

Onyń aıtýynsha, Atyraý-Inder trassasy erteń, 21 mamyrda saǵat 06:00-de qaıta ashylady. 

Eske sala ketelik, budan buryn Atyraý-Oral trassasynyń 71-shaqyrymynda jol ústimen sý ótip jatqanyn habarlaǵan bolatynbyz.