Atyraý – Inder tasjolyndaǵy apat: bir adam kóz jumyp, kólik órtenip ketti
ATYRAÝ. KAZINFORM – Atyraý – Inder avtojolynda Toyota Sienna jáne Niva avtokólikteri soqtyǵysyp, bir adam qaza tapty. Oqıǵa saldarynan Toyota Sienna kóligi órtenip ketken.
7 qarasha kúni oblystyq mańyzy bar Atyraý – Inder avtojolynyń 17-shaqyrymynda aýyr jol-kólik oqıǵasy boldy. Jol apaty saldarynan Niva avtokóliginiń júrgizýshisi oqıǵa ornynda kóz jumdy. Al Toyota Sienna avtokóligi tolyqtaı órtenip ketti.
Oblystyq polıtsııa departamenti jol qozǵalysyna qatysýshylardy qaýipsizdik talaptaryn saqtaýǵa shaqyrdy. Vedomstvonyń málimetinshe, jyldamdyqty asyrý, qarsy baǵytqa shyǵý jáne basyp ozý kezinde jol qozǵalysy qaǵıdalaryn buzý jol apattaryna sebep bolýy múmkin.
- Belgilengen jyldamdyq rejımin saqtap, qaýipsiz araqashyqtyqty ustanyńyzdar. Qarsy baǵytqa shyǵý jáne basyp ozý kezinde asa saq bolyńyzdar,- dep úndeý jasady PD.
Buǵan deıin Atyraý – Oral jáne Atyraý – Inder joldaryn jalǵaıtyn kópirde aýyr júk kólikterine shekteý qoıylǵanyn jazǵan edik.
