Atyraý halqy 15 jyl kútken kontsert zaly: qurylys alańynda ne istelip jatyr
ATYRAÝ. KAZINFORM – 2025 jyldyń tamyzynda qurylysy bastalǵan aýmaqta mýzeı blogynda monolıtti qabyrǵalar men baspaldaqtardy armırleý, galereıada qalyp montajdaý jumystary júrip jatyr.
Atyraý oblystyq qurylys, sáýlet jáne qala qurylysy basqarmasynyń málimetine súıensek, osydan 15 jyl buryn salynǵan kınokontsert zalynyń ornynda 1200 oryndyq kontserttik zal men tarıhı-ólketaný mýzeıiniń qurylysy búginde 10 paıyzǵa oryndalǵan.
- Qazirgi ýaqytta galereıanyń monolıtti qabyrǵalaryn betondaý, lıft shahtalaryn betondaý,transformatorlyq qosalqy stantsııa irgetasyn ornatý, kontsert zalynyń monolıtti qabyrǵalaryn betondaý jumysy bastaldy,-dep málimdedi basqarma.
Ótken jyldan beri 1,5 mlrdqa jýyq qarjynyń jumysy istelgen.
Jalpy ǵımarattyń jalpy qurylys alańy – 38 173 sharshy metr. Mádenı keshen úsh fýnktsıonaldy bloktan turady:
- Birinshi blok – kontsert zaly: kórmenderge arnalǵan 1200 oryndyq jáne ózge de segiz túrli zal, konferents-bólmeler, repetıtsııalyq kabınetter jáne dybys jazý stýdııasy.
- Ekinshi blok – tarıhı-ólketaný mýzeıi: tsıfrlyq jáne ǵylymı kitaphana, ǵylymı-zerthanalyq keshen, sheberlik bólmeler, arhıvtik qor saqtaý oryndary, kórme zaldary men ekspozıtsııalyq keńistikter.
- Úshinshi blok – «Dombyra» monýmentindegi kórinis alańy: kassalyq galereıa jáne qosalqy qyzmettik bólmeler.
Ár bólimde ákimshilik jáne qosalqy tehnıkalyq bólmeler qarastyrylǵan.
Aıta keteıik, elimizdiń batysyndaǵy eń úlken mádenı nysannyń qurylysy jospar boıynsha 2028 jyldyń kókteminde aıaqtalýy kerek.
Eske salaıyq, bul aýmaqta 2011 jyly kınokontsert zaly men monsha-saýyqtyrý kesheniniń qurylysy bastalǵan edi. Onyń qurylysyna bıýdjetten 3 mlrd teńgege jýyq qarjy bólingen.
2012 jyly merdigerge qatysty qylmystyq is qozǵalyp, qurylys toqtaǵan. 2013 jyly Qazaq qurylys jáne sáýlet ǵylymı-zertteý jáne jobalaý ınstıtýty (KazNIISA) nysanǵa arnaıy saraptama júrgizip, «metall konstrýktsııasy korrozııaǵa ushyrady», «nysan buzylýǵa jatady» degen qorytyndy shyǵardy.
2014 jyly oblystyq máslıhat qurylysty jalǵastyrý tıimsiz degen sheshim qabyldady.
Budan keıin sheteldik ınvestor kontsert zalyn bıznes ortalyqqa aınaldyrýǵa nıet bildirdi.
Aıaqsyz qalǵan qurylysty «Atyraý» áleýmettik-kásipkerlik korporatsııasy» AQ-nyń balansyna berý rásimi júrgizilgen edi.
2022 jyly óńirge jumys saparymen kelgen memleket basshysy jobany birjaqty etýdi tapsyrdy.
2023 jyly oblys bıligi saqaldy qurylys buzylatynyn málimdedi.
Araǵa bir jyl salyp demontaj jumysy bastaldy.
Keıin ákimdik jańa kontserttik zaldyń jobasyn jarııalady.