Atyraý garnızonynyń áskerıleri Qulsaryǵa jetý úshin 200 shaqyrymdy jaıaý júrdi

ATYRAÝ. KAZINFORM – Atyraý garnızonynyń 175 áskerı qyzmetshisi tasqyn sý basqan Jylyoı aýdanynyń ortalyǵy – Qulsary qalasyna 200 shaqyrymdy jaıaý júrip keldi. 

Qulsary qalasyna Atyraý garnızonynyń №41433, 41321 jáne 21642 áskerı bóliminiń áskerı qyzmetshileri keldi.

№41433 áskerı bóliminiń rota komandıri, kapıtan Ramazan Odınaevtyń aıtýynsha, jeke quram tasqyn sý basqan «Dossor-Quslary» baǵytyndaǵy joldy aınalyp ótken. Bul úshin 200 shaqyrymdy jaıaý júrýge májbúr bolǵan. 

«Qulsary qalasyn tasqyn sýdan qorǵaý maqsatyndaǵy jaǵalaýdy nyǵaıtý jumystaryna kómektesý úshin qosymsha jeke quram jiberildi. Áskerı qyzmetshiler tańǵy saǵat 06:00-07:00-ge 1 myńnan astam qapqa topyraq toltyryp, bógetke tósedi. Qazir bul jumysqa Jylyoı aýdanynda 200-den astam áskerı qyzmetshi jumyldyryldy», - deıdi rota komandıri Ramazan Odınaev.

Al, keshe, 6 sáýirde Jylyoı aýdanyndaǵy Jem ózeninde jasandy bógetterdi buzý bastaldy. Ony «Batys» óńirlik qolbasshylyǵyna qarasty ınjenerlik qyzmetiniń ofıtserleri júrgizdi. Sonyń nátıjesinde ózen sýynyń arnasyn burýǵa jol ashyldy. 

Eske sala ketelik, budan buryn Atyraý oblysynda tótenshe jaǵdaı jarııalanǵan edi. 

Sondaı-aq Atyraý oblysynyń bilim berý mekemelerinde sabaq oflaın formatta jalǵasatynyn jazǵan bolatynbyz.