«Atyraý» fýtbol klýbynyń Túrkııadaǵy oqý-jattyǵý jıynyna 21,5 mln teńge qaryzy bar
ATYRAÝ. KAZINFORM — «Atyraý» fýtbol klýbynyń Túrkııadaǵy qysqy oqý-jattyǵý jıynyna baılanysty qaryzy bar. Klýb bereshektiń bar ekenin rastady.
Aldyn ala málimet boıynsha, «Atyraý» fýtbol klýbynyń túrik tarapyna bereshegi 42 200 eýrony, ıaǵnı 21,5 mln teńgeni quraıdy. Bıyl qysta atyraýlyq komanda bir aıǵa jýyq ýaqyt Túrkııanyń Antalıa qalasynda oqý-jattyǵý jıynyn ótkizgen. Arada shamamen jeti aı ótkenine qaramastan, jıynǵa qatysty qarjylyq mindettemelerdiń bir bóligi áli tolyq ótelmegen.
Klýbtyń habarlaýynsha, atalǵan mindetteme qazirgi basshylyq qyzmetke kiriskenge deıin qalyptasqan.
— Atalǵan qarjylyq mindettemeler klýbtyń qazirgi basshylyǵy qyzmetine kirispeı turyp qalyptasqan. Qazirgi basshylyq klýbty basqarýǵa 2026 jylǵy 17 sáýirden bastap kiristi jáne osy kezeńde burynnan qalyptasqan birqatar qarjylyq mindettemeni de qabyldap aldy, — delingen klýb jaýabynda.
Qazir bul másele klýb ishinde zerdelenip jatyr. Bereshekti retteý jáne túrik tarapymen qarjylyq mindettemelerdi kezeń-kezeńimen oryndaý baǵytynda tıisti jumysty bastaý josparlanǵan.
— Klýb bul máseleni nazardan tys qaldyrmaıdy jáne ony aldaǵy kezeńde tolyq retteýge múddeli, — dep habarlady «Atyraý» fýtbol klýbynyń baspasóz qyzmeti.
Fýtbol klýby qazirgi ýaqytta «Munaıshy» stadıonyndaǵy jańǵyrtý jumysyna baılanysty úı matchtaryn ózge qalada ótkizýge májbúr. Oblys bıligi «Sýdoremontnık» stadıonynyń rekonstrýktsııasyn osy aıdyń aıaǵyna deıin bitirý josparlap otyr. Bul jumys aıaqtalǵannan keıin «Atyraý» klýby qarsylastaryn óz qalasynda qabyldaıdy.
Eske salaıyq, bıyl «Atyraý» fýtbol klýby tolyqtaı jekemenshik basqarýǵa ótti.
