«Atyraý» fýtbol klýbynan bir mezgilde 8 oıynshy ketedi

ATYRAÝ. KAZINFORM – «Atyraý» fýtbol klýbynyń basshylyǵy komandadan 8 oıynshynyń ketetinin habarlady. Onyń ishinde 1 qaqpashy, 2 qorǵaýshy, 2 jartylaı qorǵaýshy men 3 shabýylshy bar. 

«Atyraý» fýtbol klýbynyń bas menedjeri Dıdar Sydyqbek komandadan ketetin oıynshylardyń tizimin jarııalady.

– «Atyraý» fýtbol klýbynan 8 oıynshy ketedi. Keshe jigittermen sóılesip, alǵys aıttyq. Bárin de nazardan qaldyrmaımyz. Klýbsyz qalsa, jumysqa ornalasýyna kómek beremiz, - dep habarlady Dıdar Sydyqbek.

Onyń málim etýinshe, fýtbol klýbynan ketetin oıynshylardyń eń úlkeni – Meıram Sapanov.

Qorǵanys shebinde oınaǵan onyń jasy – 39-da. Onymen birge Amandyq Nábıhanov ta qorǵaýshy bolǵan.

Al, Ravıl Atyhanov pen Roman Chırkov jartylaı qorǵaýshy, Edige Oralbaı, Abzal Shoqan men Baǵdáýlet Zulfyqarov shabýylshy pozıtsııasynda oınady. 

Sondaı-aq 19 jastaǵy qaqpashy Sanjar Ernııazov endi «Atyraýdyń» qaqpasyn qorǵamaıdy. Ol – fýtbol klýbynan ketken 2 qaqpashynyń biri. Endi komanda quramynda 1 qaqpashy qaldy. 

– Jańa bas jattyqtyrýshy ózge oıynshylardy qarym-qabiletin kóredi. Sodan soń sheshim qabyldaıdy. Aldaǵy dúısenbide jańa oıynshylardy tanystyra bastaımyz, - dep málim etti Dıdar Sydyqbek. 

Eske sala ketelik, budan buryn «Atyraý» fýtbol klýby reseılik qaqpashymen kelisimshartty  toqtatty. 

Al, keshe «Jeńispen» kezdesýden soń Denıs Mamonov «Atyraý» fýtbol klýbynyń bas jattyqtyrýshysy qyzmetinen ketti.