«Atyraý» fýtbol klýbyna burynǵy 2 legıoner qaıta oraldy

ATYRAÝ. KAZINFORM – «Atyraý» fýtbol klýbynyń quramy taǵy 2 legıonermen tolyqty. Ekeýi de bul komandada buǵan deıin de oınap ketken.

Fýtbol klýby baspasóz qyzmetiniń aqparatyna qaraǵanda, 2 legıonermen kelisimshart jasalǵan.

Legıonerdiń biri – Igor Stasevıch Belarýs Respýblıkasynyń 9 dúrkin chempıony. Sondaı-aq Belarýs kýbogin 3 márte ıelenip, óz elinde 3 dúrkin «Jyl fýtbolshysy» atanǵan.

– Igor Stasevıch 2023-24 jylǵy maýsymda «Atyraý» klýbynyń namysyn qorǵaǵan bolatyn. Al 2018-19 jylǵy Eýropa lıgasynyń úzdik assıstenti byltyr «Atyraýmen» birge Qazaqstan kýboginiń fınalyna deıin jetken edi, - dep habarlady klýbtyń baspasóó qyzmeti.

Belarýs fýtbolshysy buǵan «Turan» komandasynyń quramynda dop tepken. Al ekinshi legıoner – Joel Ngandý Kaıamba da qaıta oraldy. Kongo Demokratııalyq Respýblıkasynyń fýtbolshysy jartylaı qorǵaýshy pozıtsııasynda oınaıdy.

– Qazaqstandaǵy eń kóp drıblıng avtorynyń biri Joel Kaıamba fýtboldaǵy mansabyn óz elindegi «Sharks» komandasynda bastaǵan. Keıinnen Chehııanyń «Glınsko», «Prshıbram» jáne «Vıktorııa» (Plzen) klýbtarynda baǵyn synady. Túrkııanyń «Samsýnspor» men «Bolýspor» klýbynda oınap, byltyrǵy maýsymdy «Atyraýda» ótkizdi. Al bıyl lıvııalyq «Ábý Sálım» klýbynda oınady, - dep málim etti klýbtyń baspasóz qyzmeti.

Eske sala ketelik, budan buryn Vıtalıı Jýkovskıı qaıtadan «Atyraý» komandasynyń bas jattyqtyrýshysy bolǵanyn habarlaǵan bolatynbyz.

Keıin Vıtalıı Jýkovskıımen birge «Atyraý» fýtbol klýbyna kimder keri oralǵanyn jazdyq.

Búgin Vıtalıı Jýkovskıı «Atyraý» fýtbol klýbyna qansha oıynshyny shaqyrǵanyn habarladyq.