«Atyraý» fýtbol klýbyn satyp alatyn kásipker 1 mlrd teńgege akademııa salý kerek
ATYRAÝ. KAZINFORM – Atyraý oblysy ákimdigi «Atyraý» oblystyq fýtbol komandasyn satýǵa shyǵardy. Nysannyń bastapqy baǵasy 175 mln teńgeden asady. Al táýelsiz kompanııa klýbtyń barlyq jaǵdaıyn saralap, 250 mln teńgege baǵalaǵan.
Aýktsıon 2026 jylǵy 10 naýryzda saǵat 10:00-de ótedi. Ótinishter 10 naýryz kúni saǵat 09:55-ke deıin qabyldanady. Shartqa sáıkes, saýdaǵa bir ǵana qatysýshy qatysqan jaǵdaıda da satý rásimi júzege asyrylady.
- Jekeshelendirý talaptaryna sáıkes, jańa menshik ıesi quny keminde 1 mlrd teńge bolatyn fýtbol akademııasyn salýǵa mindetti. Akademııa quramynda ashyq jáne jabyq fýtbol alańdary, dýsh jáne sanıtarlyq bólmeler, jattyqtyrýshylarǵa arnalǵan kabınetter, medıtsınalyq jáne qalpyna keltirý bólmeleri, keminde 50 sportshyǵa arnalǵan jataqhana nemese turǵyn oryn bolýy tıis,- dedi Atyraý oblystyq dene shynyqtyrý, sport jáne týrızm basqarmasynyń bólim basshysynyń mindetin atqarýshy Amanjol Saǵynǵalıev.
Mamandandyrylǵan sport kesheniniń qurylysy jekeshelendirý sharty jasalǵan kúnnen bastap úsh jyl ishinde aıaqtalýy qajet. Sondaı-aq oblystyq ákimdik satyp alýshyǵa mynadaı talaptar qoıyp otyr:
– Qazaqstan Premer-lıgasynda óner kórsetetin komanda quramynda keminde 25 kásibı fýtbolshy bolýy;
– klýbtyń tarıhı ataýyn, tústerin jáne emblemasyn saqtaý;
– daryndy balalar men jasóspirimderdi irikteý jumystaryn uıymdastyrý;
– oqý-jattyǵý jıyndary men daıyndyq sharalaryn qamtamasyz etý.
Budan bólek, jańa ıesi klýbtyń qarjylyq, sporttyq jáne ınvestıtsııalyq qyzmeti týraly jyl saıyn oblystyń profıldik basqarmalaryna esep berip otyrýy tıis. Jekeshelendirý sharttary satyp alý-satý kelisimshartynyń ajyramas bóligine aınalady.
Aıta keteıik, FK «Atyraý» 1980 jyldan beri kásibı komandalyq týrnırlerge qatysyp keledi. Klýb 2001 jáne 2002 jyldary Qazaqstan chempıonatynyń kúmis júldegeri atansa, 2009 jyly el Kýbogyn jeńip alǵan.
Aıta keteıik, óńirdegi fýtbol klýby 2017-2025 jyl aralyǵynda senimgerlik basqarýda boldy. Jergilikti ákimdik ókilderi kásipkerdiń basqarýynda bolǵan kezde klýb jumysy nátıjesiz boldy dep otyr. Ótken maýsymda Premer-lıgada bul komanda kósh sońyna turaqtaǵan edi.