«Atyraý» fýtbol klýby jekeniń menshigine ótedi
ATYRAÝ. KAZINFORM - Bul týraly Atyraý oblystyq dene shynyqtyrý, sport jáne týrızm basqarmasynyń basshysy Nurbol Sydyqov baspasóz brıfınginde málimdedi.
Qazirgi ýaqytta klýbtyń qunyn esepteý jumysy júrip jatyr. Bul jumyspen memlekettik satyp alý jáne kommýnaldyq menshik basqarmasynyń tapsyrysy boıynsha táýelsiz baǵalaý kompanııasy aınalysyp jatyr. Onyń baǵasyna klýbtyń materıaldyq bazasy men oıyn kórsetkishi áser etedi. Basqarma basshysy Nurbol Sydyqovtyń sózinshe, klýbtyń quny belgili bolǵannan keıin tender jarııalanyp, aqpan aıynda saýda-sattyqqa shyǵarylady.
- Jekeshelendirý boıynsha arnaıy tapsyrma bar . Sonyń aıasynda jumysty bastap kettik. Ózderińizge belgili elimizde osyǵan deıin jeke menshikke berilgen klýbtar jumys isteıdi. «Atyraý» FK satý boıynsha sheshim qabyldandy. Osyǵan deıin áleýmettik jelide klýbtyń jańa ıesi dep shyǵarǵan posttardy kórdim. Qazirgi ýaqytta klýbty osy adam satyp alady dep aıta almaımyz. Barlyǵy zań aıasynda, tenderdiń nátıjesinde belgili bolady. Tehnıkalyq sıpattamada ákimdik tarapynan satyp alatyn kompanııaǵa qoıar talaptarymyz bolady. Búginde áleýetti kásipkerlermen kelissózder júrgizilip jatyr, - dedi Atyraý oblystyq dene shynyqtyrý, sport jáne týrızm basqarmasynyń basshysy Nurbol Sydyqov.
Aıta keteıik, óńirdegi fýtbol klýby 2017-2025 jyl aralyǵynda senimgerlik basqarýda boldy. Jergilikti ákimdik ókilderi kásipkerdiń basqarýynda bolǵan kezde klýb jumysy nátıjesiz boldy dep otyr. Ótken maýsymda Premer-lıgada bul komanda kósh sońyna turaqtaǵan edi.
Osyǵan deıin Qyzylordalyq «Qaısar» fýtbol klýbynyń baqylaý keńesi qurylǵanyn jáne «Taraz» fýtbol klýby Premer-lıgaǵa oralý mindeti júktelgenin jazǵan edik.
