«Atyraý» fýtbol klýby satylymǵa shyǵaryldy

ATYRAÝ. KAZINFORM – «Atyraý» fýtbol klýby jekeshelendirý boıynsha saýda-sattyqqa shyǵaryldy. 

Klýbtyń 100 paıyz úlesi úshin bastapqy baǵa – 175,6 mln teńge, naryqtyq quny – 250,8 mln teńge. Saýda 10 naýryzda ótedi, jalǵyz qatysýshyǵa satý múmkindigi bar.

Jańa qojaıyn klýbty jaı ǵana satyp alyp qoımaı, bekitilgen 27 tarmaqtan turatyn qatań talaptardy oryndaýǵa mindetteledi. 

Investorǵa júkteletin negizgi mindetter tómendegideı:

– Fýtbol akademııasyn salý: Investor óz qarajaty esebinen quny 1 mıllıard teńgeden kem bolmaıtyn zamanaýı fýtbol akademııasyn turǵyzýy tıis.

– Infraqurylymdy saqtaý: 8 660 kórermenge arnalǵan «Munaıshy» stadıonyn tıisti deńgeıde ıelik etý jáne kútip baptaý.

– Áleýmettik jaýapkershilik: Aldaǵy 3 jyl ishinde fýtbol ortalyǵynda keminde 1 000 balany tegin oqytý. Sondaı-aq klýbtyń negizgi quramyna jergilikti tárbıelenýshilerdi júıeli túrde tartý.

– Qarjylyq ashyqtyq: Jyl saıyn kiris-shyǵys boıynsha aýdıtorlyq tekseristen ótip, memlekettik organdarǵa egjeı-tegjeıli esep berý.

– Brendti saqtaý: Klýbtyń tarıhı ataýyn, tústerin jáne emblemasyn quzyrly organdardyń kelisiminsiz ózgertýge qatań tyıym salynady.

Bul qadam klýbty tek bıznes nysany retinde emes, aımaqtyq fýtboldyń damý ortalyǵy retinde saqtap qalýdy kózdeıdi.

Eske sala keteıik, osyǵan deıin «Ordabasy» fýtbol klýby jeke basqarýǵa ótken komandalar qataryna qosylatynyn habarlaǵanbyz.