«Atyraý» fýtbol klýbynyń jańa ıesi belgili boldy

Atyraý oblystyq Sport, dene shynyqtyrý jáne týrızm basqarmasynyń bergen resmı málimetine súıensek, «Atyraý» fýtbol klýbyna qatysty qazirgi ýaqytta Qazaqstan Úkimeti men Atyraý oblysy ákimdiginiń sheshimderine sáıkes jekeshelendirý protsesi aıaqtaldy.

- Qazirgi kezeńde klýbty satý aldyndaǵy daıyndyq jumystary júrgizildi. Táýelsiz baǵalaý jasalyp, elektrondyq saýda-sattyq rásimderi uıymdastyryldy. Jekeshelendirý aıasynda memleket tarapynan klýbqa 3 jyl merzimge qoldaý kórsetý qarastyrylǵan. Bul qarajat negizgi quramdy, fýtbol ortalyǵyn jáne áıelder fýtbolyn damytýǵa baǵyttalady, - dep málimdedi basqarma.

Atyraýdyń namysyn jarystarda qorǵaıtyn komandanyń nátıjesi aldaǵy ýaqytta kóńilden shyqpasa da, taraptar arasyndaǵy kelisim ózgermeıdi.

- Kelisimsharttar jekeshelendirý zańnamasy men bekitilgen rásimder aıasynda qalyptasady jáne qajet bolǵan jaǵdaıda naqtylanýy múmkin. Alaıda olardyń komanda nátıjelerine tikeleı baılanysty ózgerýi qarastyrylmaǵan, - dedi basqarmadan.

Bıyl ákimdik uıymnyń jańa jetekshisine jekeshelendirý protsesin ashyq ári básekeli túrde ótkizý, klýbtyń qarjylyq turaqtylyǵyn qamtamasyz etý jáne onyń sporttyq ári ınfraqurylymdyq damýyn jalǵastyrý mindetin qoıyp otyr.

Jýyrda oblys ákimdigi «Atyraý» fýtbol klýbyn 2026-2028 jyldary aralyǵynda jumysyn uıymdastyratyn jańa jetkizýshige birqatar mindet júktep, 3,7 mlrd teńge bólip, tender jarııalady. Bıyl 1,3 mlrd teńgege jýyq qarjy qaralyp otyr.

Búgin, 17 sáýirde «Atyraý» fýtbol klýbyn kommertsııalandyrý protsedýrasy aıaqtalyp, memorandýmǵa qol qoıyldy. Investıtsııa quny 1 mlrd teńgege jýyqtaıdy. Ashyq konkýrsta óńirge belgili kásipker, munaı óndirý, temirjol tasymaly jáne logıstıka salasyndaǵy kompanııalardyń ıesi Bolat Qonarbaı jeńimpaz dep tanyldy. Qujat Qazaqstan Prezıdenti Qasym-Jomart Toqaevtyń otandyq fýtbol klýbtaryn jekeshelendirý jáne kommertsııalandyrý jónindegi tapsyrmasy aıasynda jasaqtaldy.

Atyraý oblysynyń ákimi Serik Shápkenov ınvestormen kezdesip, klýbtyń jańa ıelerine zor senim artatynyn atap ótti.

— Búgin biz óńirlik sportty damytýdaǵy mańyzdy bir kezeńdi qorytyndylap otyrmyz. «Atyraý» fýtbol klýby Memleket basshysy Qasym-Jomart Toqaevtyń kásibı sportqa jeke ınvestıtsııa tartý týraly tikeleı tapsyrmasy negizinde resmı túrde kommertsııalyq negizde jumys isteýge kóshti. Bul sheshim — basqarýdyń jańa modeline jasalǵan qadam. «Atyraý» FK — munaıly astananyń maqtanyshy jáne solaı bolyp qala bermek. Jeke kapıtaldyń kelýi klýbtyń damýyna jańa serpin berip, adal jankúıerlerdiń súıispenshiligi men senimin saqtaı otyryp, ony básekege qabiletti eterine senimdimiz, - dedi oblys ákimi.

Bolat Qonarbaı «Atyraý» fýtbol klýbynyń jaı ǵana bıznes-joba emes, aımaq aldyndaǵy úlken jaýapkershilik ekenin basa aıtty.

— Bizdiń maqsatymyz — Memleket basshysynyń sportty reformalaý baǵytyn ustana otyryp, tıimdi ári ashyq fýtbol sportyn qurý. Biz klýbqa uzaq merzimdi strategııamen keldik. Onda úsh negizgi basymdyq bar: jańa ınfraqurylym salý, óz shákirtterimizdi daıarlaý jáne jankúıerlermen dıalog ornatý. Oblys basshylyǵyna bizge senim bildirgeni úshin alǵys aıtamyn. Biz «munaıshylardyń» izgi dástúrin saqtaýǵa kepildik beremiz jáne «Atyraý» fýtbol komandasynyń QR chempıonaty men Kýbogynda joǵary oryndarǵa talasýy úshin bar kúsh-jigerimizdi salamyz, - dedi ol.

Klýbtyń jańa ıeleri balalar men jasóspirimder fýtbolyn damytýdy basym baǵyt retinde qarastyrmaq. Aldaǵy úsh jylda klýbtyń fýtbol ortalyǵyndaǵy tárbıelenýshiler sanyn bastaýysh toptardan oqý-jattyǵý toptaryna deıin qosa eseptegende 1 000 adamǵa jetkizý josparlanǵan. Sonymen qatar oblys aýdandarynda fýtbol ortalyǵynyń fılıaldary ashylyp, bul sport túri aımaqtaǵy barlyq balaǵa qoljetimdi bolady.

Daryndy balalardy anyqtaý men olardy qoldaýǵa basa nazar aýdarylady. Jańa qojaıyn qabiletti balalar men jasóspirimderdi irikteý boıynsha júıeli selektsııalyq jumystar júrgizýge múddeli. Komandanyń negizgi quramyna jergilikti jáne qazaqstandyq fýtbol mektebiniń túlekteri tartylady.

Kommertsııalandyrý sharty áıelder fýtbolyn damytý mindetterin de qamtıdy. Klýbtyń jańa ıesi kásibı áıelder komandasyn jáne onyń Qazaqstan birinshiliginde óner kórsetýin qamtamasyz etýi tıis.

Osy mindetterdi iske asyrý úshin jeke ınvestıtsııalar esebinen zamanaýı jattyǵý bazasy men sportshylarǵa arnalǵan jataqhanasy bar fýtbol akademııasy salynady.