«Atyraý» fýtbol klýby bıýdjetten bólingen qarjyny tıimsiz jumsaǵan ba
ATYRAÝ. KAZINFORM — «Atyraý» fýtbol klýbynyń bir top qyzmetkeri jyl basynan beri jalaqy tólenbegeni jóninde úndeý joldady. Olar oblys ákimi Serik Shápkenovten kómek suraǵan edi.
Osyǵan oraı Atyraý oblystyq dene shynyqtyrý, sport jáne týrızm basqarmasy túsinik berdi.
Basqarmanyń málimetinshe, Atyraý oblystyq prokýratýrasy «Atyraý» fýtbol klýby» JShS-niń 2022-2024 jyldary aralyǵyndaǵy qyzmetin tekserip, kóptegen zańbuzýshylyqty anyqtaǵan.
— 2023 jylǵy aqpanda shetel fýtbolshysyna 500 myń eýro transfer jasalyp, onyń 420 myń eýrosy úshinshi tulǵaǵa (Reseı Federatsııasynyń azamaty) negizsiz aýdarylǵan. Deldalmen kelisimshart mámileden eki apta buryn jasalǵan. Bul onyń zańdylyǵyna kúmán týdyrady. Al 2024 jylǵy jeltoqsanda Qazaqstan fýtbol federatsııasynan 65 mln teńge alynǵan. Atalǵan qarjynyń 20,4 mln teńgesi esepten negizsiz shyǵarylǵan. Al 30 mln teńgeni jetkizilmegen taýarlar úshin aýdarǵan, — dep habarlady basqarmadan.
Fýtbol klýby kórsetilgen jyldar aralyǵynda 662,7 mln teńge kiris tapqan. Kiristiń 132,5 mln teńgesi bıýdjetke aýdarylmaǵan.
— Quryltaıshyǵa qarjy esebi júıeli túrde tapsyrylmaǵan. Fýtbolshylar men jattyqtyrýshyǵa tólenetin jalaqyny lımıtten asyrý deregi bar. Máselen, fýtbolshylarǵa 2 mln teńge lımıttiń ornyna 3 mln, jattyqtyrýshyǵa 4 mln teńge tólengen. «Sýdoremontnık» stadıonyn jáne komanda avtobýsyn jalǵa alý kelisiminsiz zańsyz paıdalanylǵan. Jabdyqtardyń baǵasyn kóterip, 180-200 myń teńge turatyn kir jýatyn tehnıkanyń naryqtaǵy qunyn 1,8 mln teńge dep kórsetken. Basqarmaǵa bıylǵy qańtarǵa rastaıtyn qujattarsyz jáne shyǵyndardyń aldyn ala kelisiminsiz 233 mln teńgege shot berildi, — dep málim etti basqarmadan.
Alaıda «Atyraý» fýtbol klýbynyń sporttyq kórsetkishi jaqsarmaı keledi. Komanda 2018, 2019 jáne 2024 jyly Qazaqstan Kýbogyna qatysqan. Soǵan qaramastan klýb chempıonatta 7-orynnan joǵary kóterilmegen.
Eske sala ketelik, budan buryn Atyraýda qylmystyq top quryp, salyq tóleýden jaltarǵan kúdiktige izdeý jarııalanǵanyn jazǵan edik.