«Atyraý» fýtbol klýby bas bapkeriniń mindetin Qýanysh Qabdolov atqarady

ASTANA. KAZINFORM — Qýanysh Qabdolov «Atyraý» fýtbol klýby bas bapkeriniń mindetin atqarýshy bolyp bekitildi.

«Atyraý» fýtbol klýbynyń baspasóz qyzmetinen málim etkenindeı, 37 jastaǵy jergilikti maman 2009-2012 jyldar aralyǵynda «Atyraýdyń» jastar komandasynda bas bapkerdiń kómekshisi bolyp eńbek etti.

2013 jyly «Atyraý» fýtbol ortalyǵynyń basshysy bolyp taǵaıyndalyp, onyń tusynda 1999 jylǵy jasóspirimder komandasy Qazaqstan birinshiliginde jeńimpaz atandy.

2014-2020 jyldar aralyǵynda Qýanysh Kenjáliuly «Atyraý» negizgi komandasynyń bapkerlik shtabynda qyzmet etip, bas bapker kómekshisi jáne bas jattyqtyrýshy mindetin atqardy. Sol ýaqytta «munaıshylar» eki márte Qazaqstan kýbogynyń fınalyna (2017 jáne 2019 jyldary) shyqty.

Keıinnen ol 2021-2022 jyldar aralyǵynda túrkistandyq «Turannyń» bas bapkerine kómektesip, sodan soń komanda tizginin ózi de ustady.

Al byltyrǵy maýsymda aqtaýlyq «Kaspııdiń» bas bapkeri retinde birinshi lıganyń qola medalin jeńip aldy. Jas maman bıyl «Atyraý» QJL komandalarynyń úılestirýshisi retinde qyzmet atqardy.

Eske sala keteıik, budan buryn «Atyraý» fýtbol klýbynyń bas bapkeri qyzmetinen ketkenin jazǵan bolatynbyz.