Atyraý ekologteri munaı óńdeý zaýytyna jospardan tys tekserý júrgizýi múmkin

ATYRAÝ. KAZINFORM — Atyraý óńdeý zaýytyna jospardan tys tekserý júrgizilýi múmkin.

Atyraý oblystyq ekologııa departamentiniń baspasóz qyzmetinen málim etkendeı, kásiporynǵa jospardan tys tekserý júrgizý máselesi qolǵa alynǵan. 

Buǵan 4 qyrkúıek kúni keshki saǵat 21:30–da Atyraý munaı óńdeý zaýytyndaǵy E-1604-jylý almastyrǵysh apparatynan gaz shyqqany sebep bolǵan.

Gaz alaýynyń saldarynan býtenderdi olıgomerızatsııalaý qondyrǵysy toqtatylǵan edi. 

Departamenttiń aqparatyna súıensek, «Qazgıdromet» RMK-nyń Atyraý fılıaly aýa sapasy týraly málimet usynǵan.

Munaı óńdeý zaýytynda gaz alaýy janǵan kezde Atyraý qalasynda ornalasqan monıtorıng beketterinde atmosferalyq aýanyń gıgıenalyq normatıvteri ruqsat etilgen shekti shoǵyrlaný shamasynan aýytqýy tirkelmegen.

«Qazir departament tarapynan Atyraý munaı óńdeý zaýytyna jospardan tys tekserý júrgizý máselesi qozǵaldy. Tekserý kezinde QR Kásipkerlik kodeksiniń talaptary saqtalady», -dep málim etti departamenttiń baspasóz qyzmetinen. 

Eske sala ketelik, buǵan deıin Atyraý munaı óńdeý óńdeý zaýytynda kómirsýtek gazy aýaǵa jiberilgenin jazǵan bolatynbyz.