Atyraý ekologııasyna áser etetin negizgi nysandar belgili boldy
ATYRAÝ. KAZINFORM – Atyraý oblysynda atmosferalyq aýanyń kúkirtsýtegimen lastanýy keıingi jyldary jıi qaıtalanyp keledi. Bul týraly oblystyq Tabıǵı resýrstar jáne tabıǵat paıdalanýdy retteý basqarmasy Kazinform agenttiginiń resmı saýalyna bergen jaýabynda aıtty.
Basqarmanyń málimetinshe, óńirdegi negizgi lastaýshy kásiporyndardyń biri – «North Caspian Operating Company N.V.» (NCOC) kompanııasynyń «Bolashaq» zaýyty men suıyq tehnologııalyq qaldyqtardy ornalastyrý polıgony (STQOP).
– 2021 jyly «NCOC» kompanııasynyń avtomatty stantsııalary boıynsha Atyraý qalasy men Maqat aýdanynda atmosferalyq aýanyń kúkirtsýtegimen joǵary jáne ekstremaldy joǵary deńgeıde lastanýynyń 238 jaǵdaıy tirkelgen. Onyń ishinde Maqat aýdany boıynsha joǵary lastanýdyń 115, al ekstremaldy joǵary lastanýdyń 4 jaǵdaıy oryn alǵan. Joǵary lastaný faktileriniń 48 paıyzy «Bolashaq» zaýytymen baılanysty, - delingen basqarmanyń jaýabynda.
2022 jyly lastaný jaǵdaılarynyń sany azaıǵanymen, másele túbegeıli sheshilgen joq. Sol jyly zerthanalyq baqylaý bóliminiń mamandary 399 synama alyp, 1689 taldaý júrgizgen.
– 2022 jyly kúkirtsýtegimen joǵary lastanýdyń 167 jaǵdaıy tirkelip, onyń ishinde Maqat aýdany boıynsha – 42 jaǵdaı anyqtaldy, - delingen resmı qujatta.
2023 jyly da jaǵdaı ózgerissiz qalyp, atmosferalyq aýanyń kúkirtsýtegimen 233 joǵary lastaný jaǵdaıy tirkelgen.
– 2023 jyly tirkelgen joǵary lastaný jaǵdaılarynyń 33,5 paıyzy «NCOC» kompanııasynyń «Bolashaq» zaýyty men STQOP nysanymen baılanysty. Maqat aýdany boıynsha 78 jaǵdaı tirkeldi, - dep atap ótti basqarma.
Sol jyly bes márte shekti shoǵyrlaný deńgeıinen asyp ketý faktileri anyqtalǵan. Bul rette negizgi lastaýshy kózder retinde Atyraý qalasynyń oń jaǵalaýyndaǵy «Kvadrat» býlaný órisi, «Atyraý oblysy sý arnasy» RMK jáne «AMÓZ» JShS kórsetilgen.
2024 jyly ekologııalyq ahýal birshama turaqtalǵanymen, ekstremaldy joǵary lastaný jaǵdaılary qaıta tirkeldi.
– 2024 jyly kúkirtsýtegimen joǵary lastanýdyń 233, al ekstremaldy joǵary lastanýdyń 5 jaǵdaıy tirkeldi. Onyń ishinde Maqat aýdany boıynsha 54 jaǵdaı tirkelip, bul kórsetkishtiń 23,1 paıyzy «Bolashaq» zaýyty men STQOP nysanyna tıesili, - delingen basqarmanyń resmı jaýabynda.
Al 2025 jyldyń alǵashqy jartyjyldyǵynyń ózinde-aq 89 joǵary lastaný jaǵdaıy tirkelgen.
– 2025 jyldyń 6 aıynda kúkirtsýtegimen joǵary lastanýdyń 89 jaǵdaıy anyqtaldy. Ekstremaldy joǵary lastaný faktileri tirkelmedi, - dep naqtylady basqarma ókilderi.
Buǵan deıin Qazaqstanda birqatar qalada aýanyń lastaný deńgeıi joǵary kúıde qalyp otyrǵanyn jazǵanbyz.