Atyraý «ekologııalyq apat aımaǵy» atana ma — ákim jaýaby

ASTANA. KAZINFORM — Atyraý oblysyna ekologııalyq apat aımaǵy mártebesin berý máselesi boıynsha zertteýler júrgizilip jatyr. Bul týraly óńir ákimi Serik Shápkenov eseptik baıandamasynda aıtty. 

Ákimniń aıtýynsha, bul protsess ózge memlekettik organdarmen birlesip iske asyrylyp jatyr. Mundaı sheshim qabyldaý úshin vedomstvoaralyq komıssııa quryp, onyń kelisimin alý qajet.

— Qazirgi tańda biz Ekologııa mınıstrligimen jáne Densaýlyq saqtaý mınıstrligimen birlesip jumys istep jatyrmyz. Sonymen birge, Densaýlyq saqtaý mınıstrligimen birge tıisti uıymdardy tarta otyryp, geologııalyq, sanıtarııalyq jáne áleýmettik zertteýler júrgizip kelemiz. Biz Dúnıejúzilik densaýlyq saqtaý uıymymen kezdesýler ótkizip, aldyn ala kelisimderge qol jetkizdik. DDSU óz zertteýlerin aıaqtaǵan soń, bul másele qaraýǵa usynylady. Qazir Densaýlyq saqtaý mınıstrligi jáne halyqaralyq sarapshylarmen birlesip jumys júrgizilip jatyr, — dep jaýap berdi ákim Ortalyq kommýnıkatsııalar qyzmetinde tilshi suraǵyna.

2024 jyldyń alǵashqy 6 aımen salystyrǵanda, bıylǵy 6 aıda Atyraýda atmosferaǵa zııandy zattardy shyǵarý kólemi 5 tonnaǵa deıin tómendegen.

Ekologııalyq zańnamany buzǵan 139 sýbektke jalpy 2,3 trln teńge kóleminde ákimshilik aıyppul salynǵan.

— Keshendi jospar aıasynda 164,8 gektar jerge 476,6 myń aǵash, óńirlik jospar aıasynda — 69,7 gektarǵa 145,7 myń aǵash otyrǵyzyldy, — dep tolyqtyrdy oblys ákimi.

Buǵan deıin Serik Shápkenov Atyraý turǵyndarynyń 99,9%-y sý, gaz jáne elektrmen qamtylǵanyn aıtqan edi.

Aıta keteıik, Atyraý oblysynda 20 jańa joba iske asyrylyp, 1 300-den asa jumys orny ashylady.

Sondaı-aq, Atyraýda kásipkerlikti damytýǵa 9 mlrd teńge bólingen.

Atyraýǵa 83 myńnan astam týrıst kelgen. Ásirese, ortaǵasyrlyq Saraıshyq pen Qıǵash ózenindegi Lotos alqaby týrızmdi damytýdaǵy basty baǵyttarǵa aınalǵan.