Atyraý-Dossor trassasyndaǵy kópirdiń asty keńeıtilýi múmkin

ATYRAÝ. KAZINFORM – Sý tasqynyna baılanysty Atyraý-Dossor trassasyndaǵy kópirdiń asty keńeıtilýi múmkin. 

Qazir atalǵan joldaǵy kópir Jaıyq ózeninen Sokolok kanalyna quıylǵan mol sýdyń ótýine kedergi keltirip tur. Osyǵan baılanysty sol mańdaǵy 112-ýchaskedegi jumystyń úılestirýshisi Álibek Semǵalıev arnaıy komıssııaǵa kópirdiń astyn keńeıtý týraly usynys berdi. 

«Trassadaǵy kópirdiń astymen mol sýdyń ótýi qıyndady. Sol sebepti ol jaıylmaǵa ketýi múmkin. Qazirgi kezde sý Atyraý qalasynyń mańyndaǵy Birlik eldi mekeni men Juldyz-1, Juldyz-2 shaǵyn aýdandarynyń turǵyndary birigip salǵan bógetke tirelip tur. Qazirgi kezde komıssııanyń qaraýyna kópirdiń astyn keńeıtý týraly usynys berdik. Komıssııa oń sheshim shyǵarsa, Dossorǵa qatynaıtyn joldaǵy kópirdiń asty keńeıtiledi. Osylaısha sýdyń kedergisiz ótýine múmkindik jasalady. Ázirge eldi mekenderge tónetin qaýip joq. Soǵan qaramastan, bógettiń osal tustaryn nyǵaıtý jumysyn bastadyq», - deıdi Álibek Semǵalıev.

Onyń aıtýynsha, atalǵan ýchaskede qolǵa alynǵan bógetti nyǵaıtý jumysyna 15 adam men 8 arnaıy tehnıka tartylǵan. 

Eske sala ketelik, budan buryn Atyraýdyń tusynda Jaıyq ózeniniń sýy ekinshi kún qatarynan kóterilmegenin habarlaǵan edik.