Atyraý dárigerleri júkti áıelge kúrdeli otany tegin jasady

ATYRAÝ. KAZINFORM – Atyraý oblystyq perınataldyq ortalyǵynyń dárigerleri júkti áıelge kúrdeli ota sátti jasady.

Ota bas dárigerdiń orynbasary Merýert Aıdarhanovanyń aıtýynsha, patsıent júktiliktiń 38 aptasyn ótkerip júrgen. Oǵan «Jatyrdaǵy eki tyrtyq. Platsentanyń jatyrdaǵy tyrtyqqa enýi» dıagnozy qoıylǵan. 

– Ota kezinde julynǵa keshendi epıdýraldy anestezııa engizildi. Júkti áıel ota kezinde oıaý boldy. Ota avtogemotransfýzııa apparaty men laparotomııalyq ýltradybystyq skalpel qurylǵysymen jasaldy. Áıeldiń reprodýktıvtik organdary (metroplastıka) saqtaldy. Bul joly ana men bala ómirin saqtap qalý úshin keshendi em qoldanyp, jańasha ádis tańdap alyndy. Sebebi burynǵy otadan qalǵan tyrtyq saldarynan kesar tiligin jasaý qaýipti edi, - deıdi Merýert Aıdarhanova.

Onyń aıtýyna qaraǵanda, ortalyqta mundaı ota 2023 jyldan beri jasalady. Jaqynda aýtogemotransfýzııa apparaty men ýltradybystyq skalpel alynǵan. 

– Ota kezinde patsıentten ketken qan ózine qaıtadan quıyldy. Sonyń nátıjesinde patsıentke donorlyq erıtratsıtarlyq massa múldem quıylǵan joq. Ýltradybystyq skalpeldi qoldaný arqyly platsentanyń tyrtyqqa engen bóligine koagýlıatsııa jasalyp, alynyp tastaldy. Bul ádis qan ketýdi azaıtady. Qazir ana men balanyń jaǵdaıy jaqsy. Olar dárigererdiń baqylaýyna alyndy, - dep málim etti Merýert Aıdarhanova.

Dárigerdiń aıtýynsha, mundaı otanyń quny 1 mln teńge turady. Júkti áıelge ota MÁMS júıesimen tegin jasalǵan. 

Eske sala ketelik, budan buryn Atyraý kardıologteri alǵash ret naýqastyń júrek qalpaqshasyna protez salǵanyn habarlaǵan edik.