Atyraý dárigerleri alǵash ret jambasy synǵan naýqasqa kúrdeli ota jasady

ATYRAÝ. KAZINFORM – Atyraý oblystyq aýrýhanasynyń dárigerleri alǵash ret jambas súıegi synǵan naýqasqa kúrdeli otany sátti jasady. 

Atyraý oblystyq densaýlyq saqtaý basqarmasy baspasóz qyzmetiniń aqparatyna súıensek, naýqas mopedten qulap, aýyr jaraqat alǵan.

«Naýqastyń oń jaq sanynda birneshe jaraqat anyqtaldy. Súıeginiń basy artqa qaraı shyǵyp, oń jaq urshyq oıyǵynyń artqy baǵanasy jabyq kúıde yǵysqan. Bul – aýyr synyq. Mundaı dıagnozben túsken naýqastar buryn Astana nemese Almaty qalasyna ota jasatý úshin sanavıatsııamen jetkiziletin edi. Alaıda, bul otany aýrýhanada alǵash ret jasaýǵa sheshim qabyldadyq», - deıdi travmotolog Qanat Samatuly.

Dárigerdiń aıtýynsha, bul kúrdeli ota bolǵandyqtan, aldymen daıyndyq júrgizilgen. Degenmen, ota sátti jasalyp, naýqasqa barlyq medıtsınalyq kómek kórsetilgen.

«Adamnyń súıegi zaqymdanǵanda, tamyrlarynan qan ketedi. Keıde mundaı zardaptyń sońy ólimge ákelip soqtyrýy múmkin. Biz jasaǵan kúrdeli otadan soń naýqas ońaltý kýrsynan ótti. Qazir ol eshkimniń kómeginsiz júre alady. Jaǵdaıy jaqsarǵannan keıin úıine shyǵaryldy», - dep málim etti Qanat Samatuly.

Eske sala ketelik, budan buryn Atyraý dárigerleri aýyr pnevmonııaǵa shaldyqqan náresteni aman alyp qalǵanyn jazǵan bolatynbyz.

Sondaı-aq, Atyraý dárigerleri júregi toqtap qalǵan 12 jasar qyzdyń ómirin saqtap qalǵan edi.