Atyraý bıligi keı turǵyn úı keshenindegi jylytý keshenderin teńgerimine almaq
ATYRAÝ.KAZINFORM – Atyraý qalasyndaǵy kópqabatty turǵyn úılerdiń basym bóligi gıdravlıkalyq synaqtan ótkenimen, jeke turǵyn úı keshenderindegi ınjenerlik ınfraqurylymnyń tozýy, tenderlik daýlar men nysandardy qala teńgerimine qaıtarýdaǵy bıýrokratııalyq rásimder jylytý maýsymy qarsańynda áli de ózekti bolyp tur.
Atyraý qalalyq ákimdiginiń resmı aqparatyna súıensek, oblys ortalyǵyndaǵy 1 174 kópqabatty turǵyn úıdiń 1 138-i gıdravlıkalyq synaqtan ótken.
• JEO-nyń jelisine qosylǵan 1 025 úıdiń 1 012-si (98,7%);
• «Atyraý Sý Arnasy» KMK qazandyqtaryna qarasty 14 úıdiń barlyǵy (100%);
• «Turǵyn úılerge kommýnaldyq qyzmet kórsetý» JShS qazandyqtaryndaǵy 58 úıdiń 52-si (90%);
• Jeke turǵyn úı keshenderindegi 77 úıdiń 60-y (78%) synaqtan ótken.
Sondaı-aq, jeke qazandyqtardan jylý alatyn 79 úıge qyzmet kórsetetin 27 PIK daıyndyq pen jýyp-shaıý jumysyn óz qarajattary esebinen júrgizip júr.
Bıyl qalada 6,9 shaqyrym jylý qubyryn aýystyrýǵa 481 mıllıon teńge bólinip, «Industry 2050» JShS merdiger bolyp anyqtalǵan. Bul jumys úsh lotqa bólingen. Alǵashqy tenderdiń qorytyndysy shaǵymdaný satysynyda tur.
Almagúl jáne Avangard yqshamaýdanynda josparlanǵan 1384 metr jelini aýystyrý jumysy bastalmaǵan, qalǵan 4 mekenjaıdaǵy 1110 metr jylý qubyry aýysytyrlyp jatyr. Qalǵan eki lot boıynsha 4270 metr qubyrdyń basym bóligi jańartyldy, aýystyrý jumystary áli de júrip jatyr.
Júrgizilgen monıtorıng nátıjesinde «Samal Taýn», «Abyroı», «Femılı» jáne «Maltııskıı dvorık» turǵyn úı keshenderinde ınjenerlik ınfraqurylymnyń tozý deńgeıi joǵary ekeni anyqtaldy. Ásirese «Abyroı» keshenindegi qazandyqtar syrttaı jańa kóringenimen, is júzinde tozý deńgeıi óte úlken dep málimdedi ákimdik ókilderi.
- Qazirgi ýaqytta eń kúrdelisi - «Abyroı» turǵyn úı kesheni. Bul jerde qazandyqtary jańa bolǵanymen, tozý deńgeıi úlken. Sondyqtan bul zań aıasynda sheshilýi kerek. Eń bastysy – jergilikti atqarýshy organ teńgerimine berilýi tıis. Odan keıin ǵana aýystyrý jumysy júrgiziletin bolady», – dedi Atyraý qalalyq TÚKSh jáne turǵyn úı ınspektsııasy bóliminiń bas mamany Eldar Qarıpollaev.
Máseleniń basty sebebi – ınfraqurylymdy qala teńgerimine qaıtarýdaǵy bıýrokratııalyq kedergiler. Bıýdjet esebinen jeliler men qazandyqtardy jóndeý nemese aýystyrý úshin bul nysandar aldymen «E-Qazyna» júıesi arqyly qala teńgerimine ótýi shart. Qazirgi ýaqytta «Abyroı», «Samal Taýn» jáne «Femılı» turǵyn úı keshenderi boıynsha ótinishter joldanyp, konkýrstyq qujattamalar daıyndalyp jatyr.
- Atalǵan turǵyn úı keshenderindegi kárizdik sorǵy stantsııalary men qazandyqtarǵa qatysty tıisti konkýrstyq qujattar daıyndalyp jatyr. Atalǵan jumysty oryndaý úshin ashyq elektrondyq konkýrs jarııalaýǵa daıyndyq júrgizilý ústinde. Konkýrsty osy aptanyń sońyna deıin jarııalaý josparlanyp otyr,-dep málimdedi qala bıligi.
Sonymen qatar «Tulpar-1» jáne «Maltııskıı dvorık» keshenderine arnalǵan 4 dana jańa qazandyq pen 13 beketke gaz eseptegishter satyp alýǵa jalpy somasy 286 mıllıon teńgeden asatyn elektrondyq konkýrs jarııalanyp, onyń qorytyndysy daıyndalyp jatyr.
Qalalyq ákimdik ókilderi ınfraqurylym teńgerimge alynyp, konkýrstyq rásimder aıaqtalǵan soń, barlyq jumystardy jylytý maýsymy bastalǵanǵa deıin tolyq aıaqtaýdy josparlap otyr.
Eske salaıyq, 14 qyrkúıekten bastap Pavlodar oblysynda jylytý maýsymy bastaldy. Bul jumystardy soltústik jáne shyǵys óńirlerde aýa raıyna qaraı 1 qazanǵa deıin bastaý kútilýde.
