Atyraý bıligi aıaldamalarǵa arnalǵan jerdi 10 jylǵa senimgerlik basqarýǵa berdi
ATYRAÝ.KAZIBFORM — Atyraýda aıaldamalardy salýǵa arnalǵan 7 ýchaske kásipkerlerge 10 jylǵa senimgerlik basqarýǵa berildi. Negizgi maqsat — aıaldamalardyń tazalyǵy men qaýipsizdigin qamtamasyz etip, ınfraqurylymdy jaqsartý.
Bul isti qolǵa alǵandardyń biri — Aıdar Djýmııan. Ol 2020 jyly «Nursaıa» yqshamaýdanynan jer alyp, 20 mıllıon teńgege aıaldama salǵan. Qazir aıaldama jolaýshylarǵa arnalǵan ashyq alań, jyly pavılon jáne shaǵyn gúl dúkeni ornalasqan úsh blokty qamtıdy.
— Buǵan qosa, bizge taǵy eki aıaldama salý úshin ýchaskerler senimgerlik basqarýǵa berilýde. Kóktemde Geolog yqshamaýdanynda aıaldamalar salýǵa kirisemiz. Kásipkerler úshin 10 jyl — ońtaıly merzim, osy ýaqytta qansha qarajat qajet bolatynyn eseptep, sapaly nysan turǵyzýǵa bolady. Bul kezeńde ınvestıtsııalar men shyǵyndardyń ózindik quny óteledi. Biz gúlderdi ózimiz ósirip, qalada satamyz, sondyqtan bizge óte yńǵaıly. Avtobýs kútip turǵan adamdar dúkenge kirip, bireýi gúl tańdasa, kelesisi ádemi kórinisti tamashalaıdy, — deıdi Aıdar Djýmııan.
Qalalyq qarjy bólimi basshysynyń orynbasary Gúljan Qulbaevanyń aıtýynsha, kásipkerler ashyq konkýrs arqyly e-qazyna.kz saıtynda tańdalǵan.
— Senimgerlik basqarýǵa alǵandardan tek tazalyq pen tártipti saqtaý emes, 24 saǵattyq beınebaqylaý, kúzet jáne ınfraqurylymdy qadaǵalaý mindetteri de júktelgen. Kásipkerler qosymsha aýmaqty kommertsııalyq maqsatta da paıdalana alady, — deıdi Gúljan Qulbaeva
Atyraý qalasy ákimdiginiń baspasóz qyzmeti bergen aqparatqa boıynsha qala aýmaǵynda ákimdiktiń salǵan 23 aıaldamasy bar. Olardyń jumysyna, ýaqytyly ashyp-jabylýyna, tazalaǵyna «Arnaýly Avtobaza» JShS jaýapty. Olardyń birqatary buryn senimgerlik basqarýǵa berilgen edi. Alaıda kásipkerler nysandy ákimdikke keri tapsyrdy.
Osyǵan deıin Atyraý oblysynda 600 myń gektarǵa jýyq jer memleket menshigine qaıtaryldy.