Atyraý bazarlarynda sıyr eti azaıdy
ATYRAÝ. KAZINFORM — Atyraý qalasyndaǵy saýda oryndarynda sıyr eti azaıyp ketti. Bazarlar men iri dúkenderdiń et bólimderinde keıbir sóreler bos tur. Turǵyndar múıizdi iri qara etin taba almaı júrgenin aıtady.
Satýshylardyń sózinshe, sońǵy ýaqytta mal soıý oryndaryna iri qara az ákelingen. Sonyń saldarynan saýda núktelerinde kóbine jylqy men túıe eti usynylyp jatyr.
— Bazarda oryndar bos jatyr. Sıyr eti ádettegiden az kelip jatyr. Kóbine jylqy men túıe eti keledi. Sıyr eti joqtyń qasy. Keıde Oraldan soıylyp keledi, sony alamyz. Sońǵy 2-3 kúnde mal múldem bolmady. Aýdandardy jaýyp tastady, aýdannan mal kelip jatqan joq, — dedi qaladaǵy bazalarynda birinde et satatyn satýshy Klara Erǵalıeva.
Mal soıý oryndarynda da jumys báseńdegen. Ádette táýligine 40–50 bas iri qara soıylatyn bazarlardyń birinde sońǵy kúnderi birde-bir sıyr soıylmaǵan. Mal dárigerleri muny keıbir aýdandarda iri qara arasynda ınfektsııalyq rınotraheıt indetiniń taralýymen baılanystyrady. Al mal bazarynyń ákimshisi Ábý Qulbasov kórshiles Batys Qazaqstan oblysynan keletin maldyń da azaıǵanyn aıtady.
— Malǵa veterınarlyq anyqtama berilmeı jatyr. Maldyń kóbi Batys Qazaqstannan keledi. Qazir ol jaqtan Atyraýǵa mal jiberilmeı otyr. Oralda «Kýbleı» degen et óńdeıtin kombınat bar. Ettiń bári sonda ketip jatyr, — dep pikir bildirdi Ábý Qulbasov.
Veterınarlyq baqylaý jáne qadaǵalaý komıtetiniń Atyraý oblystyq aýmaqtyq ınspektsııasy óńirde tolyq shekteý joq ekenin málimdedi. Qazirgi ýaqytta tek Qurmanǵazy aýdanynda 4 okrýgte, Isataı aýdanynda 2 okrýgte shekteý bar. Ol jerlerden mal shyǵarýǵa bolmaıdy. Qalǵan eldi mekenderde másele joq.
— BQO-dan mal kelmeýine baılanysty et tapshylyǵy týyndap turǵan bolar. Al bizdiń oblys boıynsha ondaı shekteýler joq. Bordaqylaý alańdary da joq, sondyqtan maldyń 80 paıyzy Batys Qazaqstan oblysynan jetkiziledi. Qazir jergilikti mal qýańshylyq saldarynan kúıi tómen, jaǵdaıy nashar bolǵandyqtan, ony mal soıý oryndaryna sata almaıdy, — dedi aýmaqtyq ınspektsııa basshysynyń mindetin atqarýshy Nurken Baıarov.
Mamandardyń aıtýynsha, Atyraý turǵyndary jylyna shamamen 15 myń tonna sıyr etin tutynady. Tapshylyq týyndap, suranys artqan jaǵdaıda baǵanyń ósetini belgili. Oblystyq aýyl sharýashyly jáne jer qatynastary basqarmasynyń málimetinshe, óńirde áleýmettik mańyzy bar azyq-túlik taýarlarynyń tizimine kiretin sıyr eti qoryn qalyptastyrý maqsatynda 3 aýyl sharýashylyǵy taýaryn óndirýshilermen jetkizý sharty jasaqtaldy. Alaıda 2026 jyldyń naýryz aıynan bastap 2 taýar óndirýshimen kelisimshart merzimi aıaqtalǵanyn málimdedi.
— Qazirgi tańda «Marko» saýda jelilerinde 1 kg sıyr eti 3600 teńgeden satylýda. Óńirde sıyr eti qoryn qalyptastyrý jáne baǵany turaqtandyrý maqsatynda «Atyraý» ÁKK» AQ jergilikti aýyl sharýashylyǵy taýaryn óndirýshilerimen kelissózder júrgizip, áleýmettik mańyzy bar azyq-túlik taýarlarynyń qoryn qalyptastyrý erejesine sáıkes qujattaryn jınaqtaý ústinde, — dep habarlady aýyl sharýashylyǵy jáne jer qatynastary basqarmasynyń baspasóz qyzmeti.
Basqarma kelisim qujattary jınaqtalǵannan keıin kelisimshart negizindegi sıyr etiniń qory sáýir aıynda saýda jelilerine qoıylady dep otyr.
Atyraýda jeltoqsannan beri juqpaly aýrý anyqtalǵan iri qara sany 4,5 myńnan asqany jóninde jazǵan edik.
Sondaı-aq Atyraýda 8 veterınarııalyq stantsııanyń biriktiriletinin habarlaǵanbyz.
Budan bólek, sıyr etin eksporttaýshylarǵa kvota berý talaby jeńildetiletini aıtyldy.