Atyraý aýrýhanasynda 10 aılyq sábı kóz jumdy

ATYRAÝ. KAZINFORM — Atyraý qalasyndaǵy № 2 oblystyq aýrýhanada 10 aılyq sábı shetinedi.

Atyraý oblystyq densaýlyq saqtaý basqarmasy baspasóz qyzmetiniń aqparatyna qaraǵanda, naýqas 6 jeltoqsanda saǵat 14:51–de atalǵan aýrýhananyń qabyldaý bólimine túsken. 

— Qabyldaý bóliminde kezekshi dáriger balaǵa «VKI. Ostryı jıvot» dıagnozyn qoıyp, aýrýhanaǵa jatyp emdelýge keńes bergen. Sol kezde balanyń dene qyzýy +39 gradýsqa deıin joǵarylaǵan. Naýqasta qusý men mazasyzdyq bolǵan. Alaıda balanyń anasy aýrýhanaǵa jatýdan bas tartyp, «Úıde 1-2 kún qaraımyn» dep qolhat jazǵan. Kezekshi dáriger naýqastyń anasyna Atyraý oblystyq balalar aýrýhanasynyń hırýrginen keńesin alýdy usynǵan, — dep habarlady basqarmanyń baspasóz qyzmeti.

Keıin naýqas bala oblystyq balalar aýrýhanasynyń hırýrgi men pedıatr dárigerge qaralǵan. Bul aýrýhanada naýqas rentgenge túsirilip, tolyq tekseristen ótkizilip, qaıtadan № 2 oblystyq aýrýhanaǵa jiberilgen. 

— Naýqas ekinshi ret aýrýhanaǵa 6 jeltoqsanda keshki saǵat 18:10-da aýyr jaǵdaıda jetkizildi. Qabyldaý bóliminde ony kezekshi reanımatolog qarap, alǵashqy kómek berildi. Sodan soń jansaqtaý bólimshesine jatqyzyldy. Munda dárigerler jedel konsılıým uıymdastyryp, oǵan nevropatolog, oftalmolog dárigerleri shaqyrtyldy. Baladan alynǵan taldaý nátıjeleri onyń ahýaly alańdatarlyq jaǵdaıda ekenin kórsetti. Onyń júrek soǵysy birneshe ret toqtap, reanımatsııalyq sharalar júrgizildi. Alaıda soǵan qaramastan naýqas bala 7 jeltoqsanda túngi saǵat 00:20-da qaıtys boldy, — dep málim etti basqarmanyń baspasóz qyzmeti.

Eske sala ketelik, budan buryn Atyraýda jylý qubyrynyń janynan 2 adamnyń múrdesi tabylǵanyn habarlaǵan edik.