Atyraý aýrýhanalaryna medıtsınalyq 40 kólik berildi
ATYRAÝ. KAZINFORM — Atyraý oblysynyń aýrýhanalaryna medıtsınalyq 40 kólik satyp alynyp berildi.
Atyraý oblysy ákimi Serik Shápkenovtiń aıtýynsha, jergilikti bıýdjettiń qarjysyna HAVAL N6 jáne HAVAL M6 markaly kólikteri satyp alynǵan.
«Memleket basshysy Qasym-Jomart Toqaevtyń tikeleı tapsyrmasymen óńirdegi medıtsınalyq mekemelerdiń materıaldyq-tehnıkalyq bazasyn jaqsartý jumysy júıelendi. Sonyń bir mysaly — emhanalarǵa zamanýı kólikterdiń satyp alynǵany. Bıyl 7 medıtsınalyq nysan boı kóterdi. Onyń ishinde shalǵaıda ornalasqan 3 aýylda feldsherlik-akýsherlik pýnkt salynyp, qoldanysqa berildi. Qazir 15 eldi mekende dárigerlik ambýlatorııa salynyp jatyr», -dedi Serik Shápkenov.
Ákiminiń aıtýyna qaraǵanda, alys aýdandardaǵy medıtsına mekemelerin qajetti jabdyqtarmen qamtý josparlanǵan.
«Jylyoı aýdanynyń ortalyǵy — Qulsary qalasyndaǵy ortalyq aýrýhanaǵa MRT apparaty ornatyldy. Osyndaı dıagnostıkalyq qurylǵyny Qurmanǵazy jáne Inder aýdanyndaǵy aýrýhanalarǵa da ornatýdy kózdep otyrmyz. Osyndaı jumystarmen birge dárigerlerge áleýmettik qoldaý kórsetip, baspanamen qamtý máselesi qolǵa alyndy», dedi Serik Shápkenov.
Oblystyq densaýlyq saqtaý basqarmasy bastyǵynyń orynbasary Jaqsylyq Januzaqovtyń málimetine súıensek, byltyr jergilikti bıýdjet esebinen 40 sanıtarlyq «Sobol» kólikteri alynǵan.
Endi 15 jańa kólik aýdandardaǵy aýrýhanalar men aýyldyq ambýlatorııalyq pýnkterge beriledi.
Al, 25 kólik Atyraý qalasyndaǵy emhanalar men psıhıkalyq densaýlyq ortalyǵyna, Damby dárigerlik ambýlatorııasyna tapsyryldy.
Eske sala ketelik, buǵan deıin Atyraý oblysynda jedel járdem feldsherleri júkti áıeldi úıinde bosandyrǵanyn jazǵan edik.
