Atyraý-Astrahan tasjolynda kólik aýdarylyp, úsh adam qaza tapty
ATYRAÝ. KAZINFORM – Atyraý-Astrahan tasjolynda jol-kólik oqıǵasy bolyp, saldarynan úsh adam kóz jumdy.
Atyraý oblystyq Polıtsııa departamentiniń aqparatyna súıensek, jol apaty 26 tamyz kúni saǵat 05:30 shamasynda atalǵan tasjoldyń 721-shaqyrymynda bolǵan.
Aldyn ala málimet boıynsha, Toyota Ipsum avtokóliginiń júrgizýshisi kólikti basqarý júıesin ıgere almaı, jol jıegine aýdarylyp qalǵan.
Oqıǵa saldarynan úsh adam qaza taýyp, taǵy tórt adam túrli dene jaraqatyn aldy.
Qazirgi ýaqytta polıtsııa qyzmetkerleri jol apatyna qatysty tıisti is-qujattardy jınaqtap jatyr.
Polıtsııa azamattarǵa alys jolǵa shyǵar aldynda kóliktiń tehnıkalyq jaǵdaıyn tekserýdi, jolda barynsha muqııat bolýdy jáne kólik júrgizý kezinde uıaly telefon paıdalanbaýdy eskertedi. Sondaı-aq júrgizýshilerge belgilengen jyldamdyq rejımin saqtaýǵa shaqyrdy.
Buǵan deıin ShQO-da mototsıkl tizginine otyrǵan 13 jastaǵy qyz mert bolǵanyn jazǵan edik.
