«Atyraý-Almaty» baǵytyndaǵy jolaýshylar poıyzynyń qozǵalysy ýaqytsha toqtatylady

ATYRAÝ. KAZINFORM – «Atyraý-Almaty» baǵytyndaǵy jolaýshylar poıyzynyń qozǵalysy ýaqytsha toqtatylatyn boldy. Onyń ornyna bir rettik jolaýshylar poıyzy uıymdastyrylady.

«Qazaqstan temir joly» UK» AQ baspasóz qyzmetiniń málimetinshe, «Jolaýshylar tasymaly» AQ 23 qarashadan bastap tehnıkalyq sebepterge baılanysty Talgo vagondarynan quralǵan №41/42 «Almaty-2-Atyraý» jolaýshylar poıyzynyń qozǵalysyn ýaqytsha toqtatady. 

«Jolaýshylardyń tasymalyn qamtamasyz etý maqsatynda №541/542 «Almaty-2 – Atyraý» bir rettik poıyzy uıymdastyryldy. №541/542 «Almaty-2-Atyraý» poıyzynyń qozǵalys kestesi mynadaı: Almaty-2 stantsııasynan 22 qarashada jergilikti ýaqytpen saǵat 00:21-de jóneltiledi. Poıyz Atyraý stantsııasyna 23 qarashada keledi. Onyń ýaqyty dıspetcherlik kestege sáıkes anyqtalady. Al, Atyraý stantsııasynan 23 qarashada jergilikti ýaqytpen saǵat 21:40-ta júrip, Almaty-2 stantsııasyna 25 qarashada jetedi», -dep habarlady kompanııanyń baspasóz qyzmeti.

Baspasóz qyzmetiniń aqparatyna qaraǵanda, №541/542 «Almaty-2-Atyraý» baǵyty boıynsha standartty vagondarda jol júrgen jolaýshylarǵa bılet qunynyń aıyrmashylyǵy jolaýshylardy, bagajdy jáne júk bagajyn tasymaldaý qaǵıdalaryna sáıkes óteledi.

«Ulttyq tasymaldaýshy ýaqytsha qolaısyzdyqtar úshin keshirim suraıdy. Qosymsha aqparatty «1433» nómiri arqyly aqysyz alýǵa bolady», -delingen kompanııanyń aqparatynda.

Eske sala ketelik, budan buryn «Atyraý-Almaty» baǵytyndaǵy jolaýshylar poıyzy shuǵyl toqtaýǵa májbúr bolǵanyn jazǵan edik.