Atyraý akvaparkinde balalardyń ýlaný isi boıynsha qylmystyq is jabyldy

ATYRAÝ. KAZINFORM — Atyraýdaǵy Palma akvaparkinde balalardyń jappaı ýlanýyna baılanysty qozǵalǵan qylmystyq is taraptardyń tatýlasýyna baılanysty toqtatyldy. 

Eske salsaq, bıyl 13 shildede Atyraýdaǵy basseınde hlordan ýlanýdyń yqtımal deregi tirkelgen edi. Medıtsınalyq kómekke júgingen 14 adamnyń 3-eýi aýrýhanaǵa jatqyzyldy. Kýágerlerdiń aıtýynsha, basseın mańynda aýa hlor ıisinen aýyrlap ketken, sý sarǵaıyp, sýda júrgen balalar jótelip, esinen tanyp qalǵan. Úsh bala aýyr jaǵdaıda jedel járdemmen jansaqtaý bólimine jetkizilgen.

Áleýmettik jelide taraǵan aqparatqa sáıkes, tekserý barysynda hlor dozalaý júıesinde qate ketkeni anyqtalǵan. Saldarynan reagent sýǵa shamadan tys kólemde túsip ketken. Oqıǵadan keıin akvapark qyzmeti toqtatylyp, mekeme dırektory ustalǵan bolatyn. Osyǵan baılanysty Atyraý oblysy polıtsııa departamenti habarlama jasady.

— Jábirlenýshiler tarapy eshqandaı shaǵym men talap joq dep aryz jazdy. Osyǵan baılanysty qylmystyq is óndiristen toqtatyldy, — dep naqtylady vedomstvodan.

Eske salsaq, Aqtóbede bir basseınde eki adam kóz jumǵan edi.

Sonymen qatar sońǵy eki jylda elde qansha basseın tekserilgenin jazǵan edik.