Atyraý – Aqtóbe baǵytyndaǵy poıyzda bıletsiz jolaýshy qaıtys boldy
ASTANA. KAZINFORM – Atyraý – Aqtóbe baǵytyndaǵy jolaýshylar poıyzynda jol júrý bıletinsiz otyrǵan er adam kóz jumdy. Qyzmettik tekserý qorytyndysy boıynsha poıyz bastyǵy men eki jolserik jumystan shyǵaryldy.
«Jolaýshylar tasymaly» kompanııasynyń málimetinshe, oqıǵa 2026 jyldyń 13 shildesinde №691/692 jolaýshylar poıyzynda Qandyaǵash – Aqtóbe ýchaskesinde bolǵan.
Poıyz bastyǵynyń raportyna sáıkes, jolaýshy bıletsiz júrgen. Ony vagonǵa jolserik mingizgen. Jol júrý barysynda er adam kenetten qaıtys bolǵan.
Kompanııanyń habarlaýynsha, vagondaǵy aýa baptaý (kondıtsıoner) júıesi qalypty rejımde jumys istegen, al temperatýralyq rejım belgilengen talaptarǵa tolyq sáıkes bolǵan. Marqum jolaýshy otyrǵan vagon 2023 jyly shyǵarylǵan.
Poıyz Aqtóbe stantsııasyna kelgennen keıin, marqumnyń denesi qajetti protsessýaldyq is-sharalardy júrgizý úshin ýákiletti organdardyń qyzmetkerlerine tapsyryldy.
Sol kúni tasymaldaýshynyń «Batys» fılıalynda ishki qyzmettik tekserý júrgizildi. Onyń qorytyndysy boıynsha vagonnyń eki jolserigi men poıyz bastyǵynyń eńbek sharttary buzylyp, olar jumystan shyǵaryldy.
Aqtóbe ýchaskesiniń bastyǵyna jáne óndiristik oqytý jónindegi nusqaýshyǵa qatań sógis jarııalandy. Sondaı-aq, «Batys» fılıalynyń basshylyq quramyna qatysty da jumystan bosatýǵa deıingi qatań tártiptik sharalar qoldaný josparlanyp otyr.
Qazirgi ýaqytta oqıǵanyń mán-jaıyn Aqtóbe stantsııasyndaǵy Jelilik polıtsııa bóliminiń qyzmetkerleri tergep jatyr.
— «Atyraý – Aqtóbe» baǵytyndaǵy poıyzda jolaýshynyń kenetten qaıtys bolýyna baılanysty Aqtóbe stantsııasyndaǵy Kóliktegi polıtsııa bólimi qylmystyq is qozǵady. Qazirgi ýaqytta qajetti tergeý amaldary júrgizilýde. Aldyn ala qoıylǵan dıagnoz — eki jaqty pnevmonııa. QR Qylmystyq-protsestik kodeksiniń 201-babyna sáıkes ózge aqparat jarııa etýge jatpaıdy, — dep málimdedi vedomstvo.
Aıta keteıik, buǵan deıin Almaty áýejaıynda oqys oqıǵa bolyp, jolaýshylar mańyna qubyr qulaǵanyn jazǵanbyz.
