Atyraý ákiminiń orynbasary ustalǵany týraly aqparatty advokat joqqa shyǵardy
ATYRAÝ. KAZINFORM — Atyraý qalasy ákiminiń orynbasary Meıirjan Muqasovtyń ustalǵany týraly áleýmettik jelilerde taraǵan aqparat shyndyqqa sáıkes kelmeıdi. Bul týraly onyń advokaty Nurlan Jolbolov málimdedi.
Birneshe kún buryn áleýmettik jelide Atyraý qalasy ákiminiń orynbasary Meıirjan Muqasov pen «Qalalyq turǵyn úılerdi kommýnaldyq qyzmet kórsetý» JShS bas dırektorynyń orynbasary Beıbit Maǵzumov ustaldy degen aqparat tarady. Sonymen qatar qala ákimi Shákir Keıkınniń de jumys ýaqytynda Ulttyq qaýipsizdik komıteti Atyraý oblysy boıynsha departamentine túsinik berýge shaqyrtylǵany aıtyldy.
Advokat Nurlan Jolbolovtyń aıtýynsha, shahar basshysy Shákir Keıkın men onyń orynbasary Meıirjan Muqasovtan quqyq qorǵaý organdarynyń óndirisindegi qylmystyq is boıynsha jaýap alynǵan.
— Bul is boıynsha olarǵa bizdiń advokattyq keńseniń advokattary ókildik etip jatyr. Osyǵan baılanysty qala ákimi de, onyń orynbasary da ustalmaǵanyn málimdeımin. Qazirgi ýaqytta olar qyzmettik mindetterin atqaryp, jumysyn jalǵastyryp jatyr, — dep pikir bildirdi advokat Nurlan Jolbolov.
Aıta keteıik, Kazinform agenttigi 2 maýsym kúni atalǵan sheneýnikterdiń ustalý dereginiń ras-ótirigin bilý maqsatynda QR Ulttyq qaýipsizdik komıtetine resmı jaýap joldaǵan. Ázirge hatqa jaýap kelmedi.
Buǵan deıin Aqtóbe qalasy ákimi apparatynyń burynǵy basshysy bas bostandyǵynan aıyrylǵanyn jazǵan edik.
