Atyraý ákimdiginiń qyzmetkerine para alǵany úshin 3 mln teńge aıyppul salyndy

Atyraý qalalyq ákimdiginiń qyzmetkerine para alǵany úshin 3 mln teńge aıyppul salyndy. Ol endi memlekettik qyzmette jumys isteý quqyǵynan ómir boıyna aıyryldy, dep habarlaıdy Kazinform.

Sybaılas jemqorlyqqa qarsy is-qımyl agenttigi Atyraý oblystyq departamenti baspasóz qyzmetiniń málimetinshe, qalalyq kásipkerlik jáne aýyl sharýashylyǵy bóliminiń laýazymdy tulǵasyna qatysty qylmystyq is tergelgen.

«Memlekettik qyzmetshi arnaıy tehnıkany jedel tirkegeni úshin júıeli negizde 87 myń teńge kóleminde para alǵan. Atyraý qalalyq №2 sotynyń úkimimen oǵan memlekettik qyzmette jumys isteý quqyǵynan ómir boıyna aıyra otyryp, 3 mln teńge mólsherinde aıyppul salyndy. Aıyppul mólsheri – para somasynan 35 esege kóp», - dep habarlady departamenttiń baspasóz qyzmeti.

Sondaı-aq, baǵynyshty qyzmetkerine vedomstvolyq baqylaý júrgizbegen Atyraý qalalyq kásipkerlik jáne aýyl sharýashylyǵy bóliminiń basshysy tártiptik jaýapkershilikke tartyldy. Bólim basshysyna sógis berilgen.

«Ákimdikke laýazymdy tulǵalardyń tártiptik jaýapkershilikke tartýmen qatar sybaılas jemqorlyq táýekelin joıý boıynsha usynys joldandy. Qylmystyq quqyq buzýshylyq jasaýǵa yqpal etken mán-jaılardy joıý jóninde usynys berildi», - dep málim etti departamenttiń baspasóz qyzmeti.

Eske sala ketelik, buǵan deıin Atyraý qalasynyń burynǵy ákimi Qaırat Orazbaev qamaýǵa alynǵanyn jazǵan bolatynbyz.

Keıin onyń eki aı qamaýda otyratynyn habarlaǵan edik.