Atyraý ákimdigi nelikten 16 mln teńgege ǵımarat jaldap otyr
ATYRAÝ.KAZINFORM – Buǵan deıin ártúrli mekenjaıda jumys istegen Atyraý qalalyq ákimdigine qarasty bólimder bir ǵımaratta jumys isteýge kóshti. Ákimdik apparaty tender jarııalap, aı saıyn jaldamaly nysan úshin 16 mln teńge tólep otyrmaq.
«Nursaıa» yqshamaýdanyndaǵy aýmaǵy 6 myń sharshy metr bolatyn ǵımaratta endi 9 bólim jumys isteıdi. Olardyń arasynda qarjy, turǵyn úı-kommýnaldyq sharýashylyq, kásipkerlik jáne aýyl sharýashylyǵy, qurylys, jer qatynastary, sáýlet jáne qala qurylysy, ekonomıka jáne bıýdjet josparlaý, jolaýshylar kóligi men avtojoldar, ishki saıasat, qalalyq mádenıet, tilderdi damytý, dene shynyqtyrý jáne sport bólimi men ákim apparaty bar.
Al jumyspen qamtý jáne áleýmettik baǵdarlamalar bólimi Qanysh Sátbaev dańǵylynyń boıynda ornalasqan ǵımaratynda jumysyn jalǵastyra beredi.
Atyraý qalasy ákiminiń orynbasary Meıirjan Muqasovtyń aıtýynsha, bul sheshim eki máseleni sheshedi. Birinshi, qala turǵyndaryna «bir tereze» qaǵıdaty boıynsha sapaly ári tez qyzmet kórsetýge múmkindik týady. Ekinshi sebep bıýdjet qarajatyn únemdeýmen baılanysty. Buǵan deıin ákimdiktiń bólimderi jumys istegen ǵımarattardy kútip ustaýǵa, kúzetpen qamtýǵa jáne kommýnaldyq shyǵyndy tóleýge aı saıyn 88 mln teńge deıin qarjy jumsalǵan.
— Bólimderdiń ǵımaratyn kútip ustaý, kúzet qyzmetimen qamtý, kommýnaldyq shyǵyndardy tóleý shyǵy 80-88 mln teńgeniń ortasynda bolǵan edi. Qazir 16 mln teńgege basqa ǵımaratty jalǵa alýdyń arqasynda shyǵyndy birneshe ese azaıttyq. Biz qazyna qarjysyn únemdep otyrmyz. Bólimder kóshken jańa ǵımarattyń aı saıynǵy aqysyna kúzet qyzmeti men kommýnaldyq shyǵyn kiredi, — dedi qala ákiminiń orynbasary Meıirjan Muqasov.
Jýyqta bul ǵımaratqa Atyraý qalasynyń ákimi de kóshedi.
Bólimder buryn jumys istegen ǵımarattardy basqa memlekettik mekemelerdiń balansyna berý josparlanyp otyr. Meıirjan Muqasovtyń sózinshe, bosaǵan nysandarǵa suranys joǵary.
Ázirge shahar basshylyǵynda jańa ǵımarat salý josparda joq. Aldymen áleýmettik mańyzy bar, ınfraqurylymdyq jobalardy júzege asyryp, qarjyny sol baǵytta jumsamaq.
Buǵan deıin Atyraý qalasynyń kásipkerlik jáne aýyl sharýashylyǵy bólimi 10 kalkýlıatordy 3,9 mln teńgege satyp almaq bolǵanyn jazǵan edik.
