Atyraý ákimdigi kúıeýi qaıtys bolǵan áıeldi jer alý kezeginen negizsiz shyǵaryp tastaǵan

ATYRAÝ. KAZINFORM – Atyraý qalasynyń ákimdigi asyraýshysy joq áıeldi jer alý kezeginen negizsiz shyǵaryp tastaǵan. Bul sheshimmen kelispegen turǵyn oblystyq mamandandyrylǵan ákimshilik sotyna júgindi.

Atyraý qalasynyń turǵyny 2005 jyldyń jeltoqsan aıynda ákimdikten jer telimin berýdi surap, kezekke turǵan. Alaıda, ol 2011 jyldyń qarashasynda qaıtys bolǵan. 

- 2012 jyldyń sáýir aıynda jesir áıel ákimdikke jer ýchaskesine kezekti óz atyna qaıta rásimdeý týraly ótinishpen júgingen. Keıin ol jer komıssııasynyń qaraýyna birqatar tıisti qujattardy usyný qajettigi týraly jer qatynastary bóliminiń talaptaryn tolyq oryndaǵan. Al, 2015 jyldyń mamyr aıynda atalǵan bólim jesir áıelge 2005 jyldyń jeltoqsan aıynan beri jer ýchaskesine kezekte turǵany týraly anyqtama bergen. Muny EGOV jáne EGKN aqparattary rastaıdy, -dep habarlady sottan. 

Alaıda, 43 jastaǵy áıel 2023 jyldyń maýsym aıynda jer telimi kezeginen shyǵarylǵan. Bul ákimdiktiń bóliminen habarlanǵan. Keıin ol bólimge daýdy sotqa deıin retteý týraly ótinish bergen. Bólimnen bul usynystan bas tartqan.

- Talap qoıýshy resmı aqparat kózderine sáıkes 2005-2023 jyldar aralyǵynda kezekte turǵany anyqtaldy. Sot osyny eskerip, bólimniń kezekti qalpyna keltirýden bas tartýyn zańsyz dep tanydy. Bólimge talap qoıýshynyń kezegin qalpyna keltirý mindetteldi, - dep málim etti sottyń baspasóz qyzmeti.

Ákimdiktiń bólimi sot sheshimine baılanysty shaǵym túsirmegen. Al, sot sheshimi zańdy kúshine endi.
Eske sala ketelik, budan burynAtyraýda bıýdjet qarjysyn jymqyrǵan dırektor men esepshi sottalǵanyn jazǵan bolatynbyz.