Atyraý ákimdigi apatty 14 úıdiń máselesin sheshý úshin demeýshi izdep jatyr
ATYRAÝ.KAZINFORM – Atyraý qalasy «Talqaırań-2» yqsham aýdanynda osydan 6 jyl buryn salynyp, qazir apatty jaǵdaıda turǵan 14 úıdiń máselesin sheshýge jergilikti bılik demeýshi izdep jatyr.
Sebebi, bul baspanalardy salǵan «AzııaStroıServıs» kompanııasy bankrot bolǵan. Kompanııa ókilderi jáne turǵyndardyń qatysýymen jınalys ótken.
Atyraý qalasynyń ákimi Shákir Keıkınniń aıtýynsha, merdiger mekeme ókili bul máseleniń sot arqyly sheshiletinin aıtyp, ótemaqy tólenbeıtinin málimdegen.
- Merdiger mekeme «sot qorytyndysyna sáıkes maǵan qandaı shara qoldanylady, men oǵan daıynmyn» dedi. 14 úıdiń turǵyndaryn dalaǵa tastamaımyz. Ýáde berdik. Demeýshi izdep, ótemaqy tóleý máselesin qarastyryp jatyrmyz. Bizdiń jaýabymyzǵa qaǵanattanbaı otyrǵan keı turǵyndarǵa sotqa júginýge usynys berdik, - dep pikir bildirdi Atyraý qalasynyń ákimi Shákir Keıkın.
Shákir Keıkınniń sózinshe, 244 mln teńgege osy úılerdiń qurylys jumystary júrgizilgen.
Esterińizge sala keteıik, 2020 jyly «Nurly Jer» baǵdarlamasy arqyly «Talqaırań-2» yqsham aýdanyna 60 úı salynyp, turǵyndarǵa berilgen. Onyń 12-si – ekiqabatty. Al 28 úı birqabatty. Qalǵan 20 baspana eki páterden turady. Bul úılerdi 3 merdiger salǵan. Azamattar «Otbasy bankten» ıpotekaǵa alǵan. Alaıda az ýaqyt ótkennen keıin qabyrǵalary jarylyp, eden túsip ketken. Tipti jarlary qulap, adam ómirine qaýip tóndirgen. Sondyqtan kópshilik páter jaldap júrýge májbúr.
2025 jyldyń kúzinde osy yqsham aýdanda salynǵan turǵyn úılerdiń sapasyna qatysty turǵyndar tarapynan kelip túsken aryz-shaǵymǵa baılanysty qylmystyq is qozǵaldy.
Bıyl 5 aqpanda memlekettik ǵylymı-zertteý jáne jobalaý ınstıtýtynyń qorytyndysy shyqty. Mamandar úılerdiń sapasy syn kótermeıtinin málimdegen. Jóndeýge kelgenmen, onyń shyǵyny jańa úıdiń qurylysyna kerekti qarjymen birdeı bolady. 54 úıdi salǵan «BatysAlıansStroı» JShS 60 jáne 120 sharshy metrli baspanalarǵa 18 jáne 30 mln teńge kóleminde ótemaqy tóleýge daıyn ekenderin aıtqan edi.
Osyǵan deıin Atyraýda 7 jyl buryn bastalǵan 24 turǵyn úı jobasy áli aıaqtalmaǵanyn jazǵan edik.