Atyraý ákimi bógetti nyǵaıtýǵa kómektesken 92 jastaǵy ájege Prezıdenttiń alǵysyn jetkizdi
ATYRAÝ. KAZINFORM – Atyraý oblysynyń ákimi Serik Shápkenov bógetti nyǵaıtýǵa kómektesken 92 jastaǵy ájemen kezdesti. Oǵan Prezıdenttiń alǵysyn jetkizdi.
Mahambet aýdanyndaǵy Beıbarys aýylynda turatyn Orynsha Qojıevanyń jasy – 92-de. Ol 10 balasynan 16 nemere men 10 shóbere súıip otyr. «Pervomaıskıı» JShS-da, keıin zeınetkerlikke shyqqanǵa deıin mektepte jumys istegen.
Al keıingi kúnderi aýyldastaryna Jaıyq ózeniniń jaǵalaýyn nyǵaıtý úshin qapqa topyraq toltyrýǵa kómektesken. Bul týraly áleýmettik jelide vıdeo taraǵan.
«Beıbarys aýylyndaǵy mektep ujymyna jaǵalaýdy nyǵaıtý jumysyna úles qostyńyz. Prezıdent qońyraý shalyp, janqııarlyq eńbegińiz úshin alǵys aıtýdy tapsyrdy. Siz sý tasqynyna daıyndyq jumysyna úlesińizdi qosyp, jastarǵa úlgi bolyp otyrsyz», - dedi Serik Shápkenov.
Orynsha Qojıevanyń aıtýynsha, eldi mekendi tasqyn sýdan qorǵaý – barshanyń paryzy. Sol sebepten úıinde otyra almaǵan.
«Qazir biraz jasqa kelip qaldym. Sondyqtan meniń qolymnan qum toltyrylatyn qapty jedel daıyndap otyrý ǵana keledi. Tabıǵattyń tosyn minezin boljaý múmkin emes. Osy jasyma deıin mundaıdyń talaıyn kórdik. Sondyqtan sý tasqynyna aldyn ala daıyndalý kerek», - deıdi Orynsha Qojıeva.
Oblys ákimi búgin Atyraý oblysynda tabıǵı sıpattaǵy tótenshe jaǵdaı rejımin jarııalaýdyń maqsatyna toqtaldy.
«Bul – jergilikti atqarýshy organdar men tıisti qyzmetterdiń aldaǵy sý tasqynyna qarsy daıyndyǵyn kúsheıtý maqsatynda jasalǵan qadam. Dúrbeleńge salynýǵa, úreılenýge esh sebep joq», - dedi Serik Shápkenov.
Eske sala ketelik, buǵan deıin Atyraý oblysynda tótenshe jaǵdaı jarııalanǵan bolatyn.
Sondaı-aq, Atyraý oblysynda evakýatsııalaý úshin 15 myń oryn daıyndalǵanyn jazǵan bolatynbyz.
Tasqyn sý qaýpi Qulsary qalasynyń 7 shaǵyn aýdanyna tónip turǵanyn habarlaǵan edik.
«Teńiz» kenishindegi vahtalyq qalashyqqa 6,5 myńnan astam adam evakýatsııalandy.
