Atyraý munaı óńdeý zaýytyndaǵy aqaýdyń sebebin arnaıy komıssııa tekseredi

ATYRAÝ. KAZINFORM — Atyraý munaı óńdeý zaýytyndaǵy býtendi olıgomerızatsııalaý qondyrǵysyndaǵy benzın kollektorynda aqaý shyqqan edi. Atalǵan aqaýdyń sebebin tekserý úshin arnaıy komıssııa quryldy.

Ónerkásiptik qaýipsizdik komıtetiniń Atyraý oblysy boıynsha departamenti baspasóz qyzmetiniń aqparatyna súıensek, arnaıy komıssııa tekserýdi bastaıdy. 

«Qazaqstan Respýblıkasy Tótenshe jaǵdaılar mınıstrligi Ónerkásiptik qaýipsizdik komıtetiniń Atyraý oblysy boıynsha departamentinen avarııany tergeý úshin arnaıy komıssııa quryldy. Tergeý nátıjeleri qosymsha habarlanatyn bolady», -dep habarlady departamentten.

Eske sala ketelik, Atyraý munaı óńdeý zaýytynyń benzın kollektoryndańy aqaý 26 aqpanda anyqtalǵan. 

«Ónimdi tez yǵystyrý úshin osy jelige 15 kg/tekshe sm qysymmen sý berildi. Qazir aqaý anyqtalǵan ýchaskeni joıý boıynsha jedel sharalar qabyldandy. Barlyq tehnologııalyq qondyrǵy shtattyq rejımde jumys istep tur. Munaı ónimderin óndirý jáne jóneltý josparǵa sáıkes júzege asyrylyp jatyr», -dep habarlaǵan edi zaýyttyń qoǵammen baılanys bólimi. 

Sondaı-aq, «QazMunaıGaz» komıssııasy Atyraý munaıyn óńdeý zaýytyn tekserýdi bastaǵanyn jazǵan edik. 

Komıssııanyń tekserýinen soń zaýyttyń bas dırektory men bas ınjeneri qyzmetinen bosatyldy.

Keıin Atyraý munaı óńdeý zaýytynyń jańa bas ınjeneri taǵaıyndaldy.