Aty-jónin aýystyrǵan adamnyń JSN-i ózgere me
ASTANA. KAZINFORM – Qazaqstanda azamat aty-jónin ózgertken jaǵdaıda onyń jeke sáıkestendirý nómiri (JSN) ózgermeıdi. Bul týraly QR Ádilet mınıstrliginiń Tirkeý qyzmeti jáne zańgerlik qyzmetter kórsetýdi uıymdastyrý komıteti tóraǵasynyń orynbasary Dıas Sháripbaı Kazinform agenttiginiń resmı saýalyna bergen jaýabynda aıtty.
Onyń túsindirýinshe, sáıkestendirý nómiri azamattyq hal aktilerin tirkeý jáne jeke basyn kýálandyratyn qujattardy berý kezinde beriledi.
– Azamatqa jańa qujat berilgen saıyn JSN qaıta berilmeıdi, ıaǵnı aty-jónin ózgertip, qujattaryn jańartqan jaǵdaıda da burynǵy JSN-i saqtalady. Tek bala asyrap alý jáne JSN-di esepteý kezinde qate ketken jekelegen jaǵdaılarda ǵana jańa nómir berilýi múmkin. Osylaısha, azamat atyn, tegin nemese ákesiniń atyn ózgertkennen keıin de memlekettik tsıfrlyq júıelerde burynǵy JSN-i arqyly sáıkestendiriledi, -dedi tóraǵa orynbasary.
Onyń málimetinshe, aty-jóni ózgergen kezde memlekettik tsıfrlyq júıelerdegi derekter jańa málimetterge sáıkes jańartylady. Sonymen birge burynǵy jáne qazirgi derekterdiń ózgerý tarıhy saqtalyp, olardyń ózara baılanysy qamtamasyz etiledi.
Osylaısha, azamat aty-jónin birneshe ret ózgertken jaǵdaıda da burynǵy jáne qazirgi derekteriniń bir adamǵa tıesili ekeni JSN men derekterdiń ózgerý tarıhy arqyly anyqtalatyn bolady.
