Aty-jóni ólilerdiń tizimine enip ketken stýdent Almatyda 15 kún buryn bolǵan

Hosteldegi órt kezinde qaza taptyǵa balanyp, aty-jóni ólilerdiń tizimine enip ketken saryaǵashtyq jetkinshektiń ákesi bolǵan jaıdy baıandap berdi, dep habarlaıdy Kazinform.

Ámiráli Ramazan Almatyǵa bir kúnge qonaqqa barǵan. Sodan jatatyn jer bomaǵan soń, hosteldiń qyzmetine júginipti. Bul týraly Kazinform saıtynyń tilshisine onyń ákesi aıtty.

«Balam 15 kún buryn Almatyǵa qonaqqa bardy. Barǵan kúnniń erteńine qaıtyp keldi. Sodan densaýlyǵy syr berip júrgendikten Tashkentke alyp baryp, dárigerlerge kórsetip qaıttym. Qazir úıde em qabylap jatyr. Allaǵy shúkir aman-esen. Al, aty-jóniniń qaıtys bolǵandar tizimine enip ketýi – sol jerdegi mamandardyń kinási. Eshkim teksermegen. Búkil tizimdi bere salǵan bolýy kerek, ishinde meniń 15 kún buryn baryp, bir kún jatyp ketken ulymnyń da aty-jóni júr» - deıdi ákesi Batyráli Bekqulov.

Sondaı-aq Ramazannyń ákesi aqparattyq keńistikte tarap jatqan jalǵan aqparattardyń saldary balasynyń oqýyna keri áser etip jatqanyn málimdedi.

«Meniń balam Shymkentte oqıdy. Bıyl dıplom alýy kerek edi, qazir ustazdary oqýdan shyǵarmaq bolyp jatyr eken. Balam jumys isteýge emes, qonaqqa bardy. Bir kúnge. Sodan beri emdelip jatyr. Úıimizde Tashkentke baryp-kelgen qaǵazdarymyz, ondaǵy dárigerlerdiń nusqamalary da saqtaýly tur. Oqý ornynyń basshylyǵy men ustazdary túsinistikpen qarasa deımin» - deıdi ol.

Aıta keteıik, hosteldegi órtten qaza tapqan Beıbarys Áldibek Qazyǵurt aýdanynda jerlendi. Ol nebári 20 jasta edi.

Eske salaıyq, 30 qarasha kúni Almatyda hostel órtenip, 13 adam qaza tapty.

Órtten zardap shekken adamdar qalalyq jedel shuǵyl kómek kórsetý aýrýhanasyna jetkizildi. Qalalyq densaýlyq saqtaý basqarmasynyń málimetine sáıkes, naýqastyń birine kómirqyshqyl gazynan ýlaný dıagnozy qoıyldy. 

Órt shyqqan «Almaty Hostel» Halyk Bank menshigindegi ǵımaratta ornalasqany belgili boldy. Qazaq tapqandardyń toǵyzy — qazaqstandyq, qalǵany sheteldikter ekeni anyqtaldy. Keıin hostelde turyp jatqan stýdentter órt bastalǵan kezde ǵımarattan qalaı shyqqanyn aıtyp berdi.
Sondaı-aq hosteldyń ıesi – «KÝSA Halyk» JShS. Ony jalǵa alǵan – «ALA Hostel» JShS. Jaldaý týraly kelisimshart bıyl 21 qyrkúıekte jasalǵany anyqtaldy.