Aty joq jáne qaıtalanatyn kóshelerdiń ataýy ózgeredi – mınıstrlik

ASTANA. KAZINFORM – Kóshe ataýlaryna arnaıy tizimge engen dástúrli ataýlar, jer-sý ataýlary, tarıhı tulǵalardyń ǵana ataýlary beriledi. Bul týraly Mádenıet jáne aqparat mınıstrliginen málim etti.

— Bul salada júıeli jumys istelip jatyr. Kezinde jergilikti jerlerdi júıesiz ataýlar kóbeıip ketti. Turǵyndar ataýlardyń máni men mazmunyn túsinbeı jatty. «Nege kóshe ataýa basqa adamǵa berilmedi» degen daý kóbeıdi. Memleket basshysy bul jumysty júıelendirip, Respýblıkalyq onomastıkalyq komıssııa jumysynyń aıasynda júzege asyrýdy tapsyrdy. Sondyqtan tarıhı tulǵalardyń tizimi aıqyndaldy. Sol tizimge kirgen adamdardyń ǵana esimin berý talaby bar. Bul tizimde bolmasa, onyń ataýyn berilmeıdi, - delingen mınıstrliktiń Kazinform agenttigine bergen jaýabynda.

Osy tizimdi ákimdikter 2 jylda bir ret jańartyp turady.

— Munymen qosa, ǵalymdarmen birlese tarıhı ataýlardyń da tizimi jasaldy. Qazir arnaıy jol kartasy bar. Onyń aıasynda birinshi kezeńde ataýy joq jáne qaıtalanatyn kóshelerdiń ataýlaryn ózgertý eskerilgen. Bul is-sharalar kezeń-kezeńmen júzege asyp jatyr, - dep atalyp ótken vedomstvo aqparatynda.

Aıta keteıik, byltyr mınıstr Aıda Balaeva onomastıkada jershildik pen rýshyldyqqa jol berilmeıtinin málimdedi. 

Eske salsaq, 2023 jyly Memleket basshysy Qasym-Jomart Toqaev Ulttyq quryltaıdyń negizgi otyrysynda onomastıka máselesinde aımaqtardyń ereksheligi men jalpyulttyq basymdyqtar eskerilýi kerek ekenin aıtty.