Aty ańyzǵa aınalǵan akter Djekı Chan Mańǵystaý óńirine taban tiredi
ASTANA. KAZINFORM — 13 shildede óńirge aty ańyzǵa aınalǵan akter, rejısser, prodıýser ári jekpe-jek óneriniń sheberi Djekı Chan bardy, dep habarlaıdy Mańǵystaý oblysy ákiminiń baspasóz qyzmeti.
Ol halyqaralyq «Dospehı Boga 4: Ýltımatým» (Armour of God: Ultimatum) kórkem fılminiń túsirilimine qatysady. Akterdi Mańǵystaý oblysynyń ákimi Nurdáýlet Qılybaı qarsy aldy.
Mańǵystaýdyń aýqymdy halyqaralyq kınojobanyń negizgi túsirilim alańdarynyń biri retinde tańdalýy álemdik kınoındýstrııanyń Qazaqstannyń biregeı tabıǵı landshafttaryna degen qyzyǵýshylyǵynyń artyp kele jatqanyn kórsetedi.
Fılmniń basty túsirilim oryndarynyń biri — álemge áıgili Bozjyra shatqaly bolmaq.
Kezdesý barysynda Nurdáýlet Qılybaı mundaı aýqymdy halyqaralyq jobalardyń óńirdiń týrıstik áleýetin arttyrýǵa, ınvestıtsııa tartýǵa jáne Mańǵystaýdyń álemdik deńgeıdegi tanymaldylyǵyn kúsheıtýge zor serpin beretinin atap ótti.
Djekı Chan jyly qabyldaǵany úshin alǵysyn bildirip, Mańǵystaýdyń tabıǵı landshafttary erekshe kınematografııalyq áleýetke ıe ekenin jáne bolashaq fılmniń eń kórnekti kórinisteriniń birine aınalatynyn aıtty.
«Dospehı Boga 4: Ýltımatým» (Armour of God: Ultimatum) jobasy Qazaqstan Respýblıkasy Mádenıet jáne aqparat mınıstrliginiń qoldaýymen júzege asyrylýda. Fılmniń óndirisimen qazaqstandyq Sálem Entertainment kompanııasy aınalysady.
Buǵan deıin Aıda Balaeva Djekı Chandy Qazaqstandaǵy túsirilimniń bastalýymen quttyqtaǵan edi.
