Atbasarlyq volonterler tyl ardagerlerine kómektesýde - Aqmola oblysy
«Tselına» qoǵamdyq qorynyń eriktileri tyl ardagerleriniń úıine baryp, aýlalary men úı mańynyń qaryn kúrep, kúl-qoqystan tazartýda.
Qazaqstannyń ósip-órkendeýine, elimizdiń beıbit ómir keshýine óz úlesterin qosqan osy ardaqty da aıaýly qarttarymyzdyń ómir joldary búgingi urpaqqa úlgi-ónege. Osy kúni elimizde qarttarǵa úlken mán berip, kóńil aýdaryp, jan-jaqty qamqorlyq jasalýda. Ásirese, óz betimen qozǵalýy qıyn ardagerlerge qysta jer úı aýlasyndaǵy qardy kúrep, sý tasý qıynnyń qıyny. Mundaıda jastar men eriktiler únemi kómektesýge ázir. Búgingi kúni Atbasar aýdanynda da bireýdiń kómegine zárý tyl jáne eń ardagerleri bar. Sondaı jandardyń biri – tyl ardagerleri erli-zaıypty Nıkolaı men Lıýmıla Rýdenkonyń otbasy. 95 jáne 88 jastaǵy qarııalar kezinde tylda eńbek etken. Eki ul ósirip, olar Reseıge qonys aýdarǵan. Ózderi qazirgi tańda Atbasarda turyp jatyr.
«Tselına» qoǵamdyq qory dırektorynyń orynbasary Mıhaıl Pelıh bastaǵan eriktiler – Danıl Panchenko men Maqsat Pelıýshko atalmysh qarııalardyń úıine baryp, aýlalary men úı mańaıynyń qaryn kúrep, kúl-qoqystan tazartýǵa kómektesti.
«Aǵa býynǵa qamqorlyq jasaý – jas urpaqtyń paryzy. Bizdegi eriktiler ardagerlerimizge qysqa otyn daıyndap, aýlany qardan tazartýdy, dúkennen kerekti azyq-túlik pen dárihanadan dári-dármegin alyp kelýdi ózderiniń mindeti sanaıdy», - deıdi Mıhaıl Pelıh.
Onyń aıtýynsha, aýdanda 100-ge jýyq erikti tirkelgen bolsa, osy kúni onyń 20-sy belsendi jumys isteýde. Bul eriktiler jyl basynan beri osyndaı tórt qarııanyń úıine baryp kómek kórsetken. Sonymen qatar, múgedek jandarǵa da udaıy qol ushyn sozyp otyrady.
Budan bólek, aýdan eriktileri dúnıejúzine taraǵan koronavırýs juqpasynyń óńirde tarap ketpesi úshin qolǵa alynǵan aldyn alý sharalaryna úles qosýda.